Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 56 Hüküm no: 19 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın uhdesinde bulunan evi ile bazı eşyalarını kızı Safiye’ye sattığı Medîne-i Üsküdar’da Turbâli mahallesi sâkinelerinden olup zâtı <> Ali Beşe b. Ahmed ve Mehmed Beşe b. Mehmed nâm kimesneler ta‘rîfleriyle mu‘arrefe olan Âişe bt. Ali nâm hatun meclis-i şer‘-i şerîf-i enverde kebîre kızı işbu râfi‘atü’l-vesîka Safiye bt. el-Hâc Yusuf nâm hatun mahzarında bi-tav‘ihâ ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup medîne-i mezbûre mahallâtından Solak Sinan mahallesinde vâki‘ bir tarafdan imâma meşrûta Rukiye Hatun tasarrufunda olan vakıf menzil ve bir tarafdan bey mülkü ve bir tarafdan Yusuf Beşe mülkü ve bir tarafdan tarîk-i âm ile mahdûd fevkānî iki bâb oda ve bir sofa ve bir matbah ve bir mikdâr havluyu müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile kızım mezbûre Safiye’ye yüz guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve kabûl ve temellük ve tesellüm eyledikden sonra semeni olan meblağ-ı merkūm yüz guruşun otuz guruşunu mukaddemâ kızım mezbûre yedinden istikrâz ve kabz u istihlâk eylediğim otuz guruş deynime mahsûb takas eylediğimde ol dahi mukāssa ve kabûl eylediğinden sonra bâkī kalan meblağ-ı merkūm yetmiş guruş mutâlebesinden kızım mezbûre Safiye’nin zimmetini ibrâ ve iskāt eyledim fî-mâ ba‘d menzil-i mahdûd-ı mezkûr kızım mezbûrenin mülk-i müşterâsı olup benim kat‘â alâka ve medhalim kalmadı keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î yine mukırre-i mezbûre Âişe meclis-i şer‘de kızı mezbûre Safiye muvâcehesinde ikrâr ve takrîr-i kelâm edip eşyâ-i memlûkemden on yastık ve iki baş yasdığı ve beş minder ve üç yan keçesi ve bir orta keçesi ve <<üç>> üç döşek ve yedi yorgan ve dört tencere ma‘a kapak ve bir kebîr sini ve bir sagīr sini ve bir leğen ibrik ve bir tâbe-i dest ve bir tas ma‘a kapak ve bir hamam tası ve bir kahve tebsisi ve bir güğüm ve kefkir ve bir kefçe ve iki kahve ibriği kızım mezbûre Safiye Hatun’a mukaddemâ cihâz olmak üzere hîbe ve temlik ü teslîm eylediğimde ol dahi meclis-i hîbede bilâ-mâni‘ ittihâb ve temellük ve tesellüm ve kabz ve kabûl eyledi fî-mâ ba‘d eşyâ-i muharrere-i mezkûre kızım mezbûre Safiye’nin mülk-i mevhûbu olup benim kat‘â alâka ve medhalim kalmadı keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min-Şa‘bâni’l-mu‘azzam li sene 1150 Şuhûdü’l-hâl: Sarrâcbaşı el-Hâc Mehmed Ağa, Takyeci Hasan Ağa b. ( ), es-Seyyid el-Hâc Ahmed b. es-Seyyid Ali, Ali Beşe b. Ahmed, Yahya Beşe b. Ahmed, Mustafa Beşe b. Şa‘bân, Mehmed Efendi b. Mustafa, Molla Hüseyin b. Osman, Molla Abdullah b. Ali, Müezzin Ali Çelebi b. Receb, Molla İbrahim b. Mehmed, Veli Bey b. Mehmed, Osman Bey b. Mehmed, Çukadâr Osman b. Hasan.