Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 57 Hüküm no: 20 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Abdullah’ın evini ve bazı eşyalarını İbrahim Beşe’ye sattığı Medîne-i Üsküdar muzâfâtından Adalar nâhiyesine tâbi‘ Viranbaşı? karyesi sâkinelerinden olup zâtı Ahmed b. Mehmed ve [A]hmed b. Ali nâm kimesneler ta‘rîfleriyle mu‘arrefe olan Havva bt. Abdullah nâm hatun meclis-i şer‘-i hatîrde mahmiye-i İstanbul’da Yemiş İskelesi’nde sâkin işbu râfi‘ü’l-kitâb İbrahim Beşe b. Ömer nâm kimesne mahzarında bi-tav‘ihâ ikrâr ve takrîr-i kelâm edip bey‘-i âti’l-beyânın vukū‘una değin silk-i mülkümde münselik emlâkimden olup karye-i mezbûrede vâki‘ bir tarafdan Abdi Paşazâde mülkü ve bir tarafdan tarla ve iki tarafdan tarîk-i âm ile mahdûd mülk menzilim ile yine eşyâ-i memlûkesinden [memlûkemden] dört minder [ve] on iki yastık ve beş yorgan ve dört tencere ve dört sahan ve üç lenger ve bir kebîr kazgan ve bir kebîr tâbe ve iki sandık ve kırk vakıyye yün ve altı re’s ma‘lûmü’l-cins ve’l-evsâf sığır ve sâir menzil derûnunda vâki‘ hırdavât-ı ma‘lûmeyi tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr İbrahim Beşe’ye yüz guruşa bey‘ ü temlîk ve teslîm [ve] kabûl eyledikden sonra semeni olan meblağ-ı mezbûr yüz guruşu tamâmen ahz u kabz eyledim eşyâ bi’l-külliye mezbûr İbrahim Beşe’nin mülk-i müşterâsı olmuşdur benim kat‘â alâka ve medhalim kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. [Sene] 1150 Şuhûdü’l-hâl: Bakkāl Hüseyin Beşe b. Abdullah, Bakkāl Salih Beşe b. Abdullah, Mustafa Bey b. Ahmed, Veli Bey b. Mehmed.