Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 58 Hüküm no: 21 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hanım’ın vefat eden kocasından intikal eden bağı Eskici Mehmed Beşe’ye sattığı <> medîne-i Üsküdar’da Gülfem Hatun mahallesi sâkinelerinden olup zâtı el-Hâc Ömer b. Hüseyin ve Resul Beşe b. Abdullah nâm kimesneler ta‘rîfleriyle [mu‘arrefe] olan Emetullah bt. Mehmed nâm hatun meclis-i şer‘-i şerîf-i enverde işbu sâhibü’l-vesîka Eskici Mehmed Beşe b. Hızır nâm kimesne mahzarında ikrâr ve takrîr-i kelâm edip medîne-i mezbûreye müzâfe Adalar nâhiyesine tâbi‘ Pendik nâm karye toprağında vâki‘ bir tarafdan Yorgi zimmî bağı ve bir tarafdan müşteri-yi mezbûrun âhar bağı ve bir tarafdan dere ve bir tarafdan tarîk-i âm ile mahdûd üç bin çubuk bir kıt‘a kürûmu mülk kış üzümü bağı bundan akdem vefât eden zevcim Mustafa Beşe b. Süleyman nâm kimesnenin ile’l-vefât mülkü, ba‘de vefâtihî terekesinden olup veresesi on bin akçe mehrim mukābelesinde bana bey‘ u teslîm etmeleriyle ilâ-hâzihi’l-ân ber-vech-i muharrer mülküm olmağla bağ-ı mahdûd-ı mezkûru tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Beşe’ye altmış dört guruşa bey‘-i bâtt temlîk ve teslîm [ve] kabûl eyledikde [ol dahi] ber-vech-i muharrer iştirâ [ve] kabûl eyledikden sonra semeni [olan] meblağ-ı merkūm altmış dört guruşu mezbûr Mehmed Beşe yedinden bi’t-tamâm ahz u [7b] kabz eyledim ba‘de’l-yevm bağ-ı mahdûd-ı mezkûrda benim kat‘â alâka ve medhalim kalmayıp mezbûr Mehmed Beşe’nin mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: el-Hâc Ömer b. Hüseyin, el-Hâc Mehmed b. İsmail, Mehmed Efendi b. Ali, Salih Beşe b. Hüseyin, Abdi Beşe b. ( ).