Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 59 Hüküm no: 22 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbaki Efendi’nin İznikmid kazasında bulunan Musa çiftliğindeki yarım hissesini Ebubekir Efendi’ye sattığı Medîne-i Üsküdar’da Toygar Hamza mahallesinde sâkin es-Seyyid Abdülbaki Çelebi b. el-Hâc Ebubekir Efendi nâm kimesne meclis-i şer‘-i şerîf-i enverde vâlidi işbu sâhibü’l-vesîka umdetü’l-ulemâi’l-izâm mûmâ-ileyh el-Hâc Ebubekir Efendi mahzarında bi-tav‘i’s-sâf ikrâr ve takrîr-i kelâm edip vilâyet-i Anadolu’da medîne-i İznikmid kazâsında vâki‘ Evrenkös hudûdu dâhilinde Hasyerleri demekle ma‘rûf mevzi‘de kâin lede’l-ahâlî ma‘lûmü’l-hudûd ve’l-müştemilât olup Kadı Musa köyü nâm-ı diğer Musa çiftliği demekle şehîr çiftliğin nısf-ı şâyi‘i ile derûn-ı çiftlik-i mezkûrda mevcûd yirmi re’s camus ineği ve elli vakıyye evân-ı nühâs ve otuz yedi çit saman ve iki yüz keyl mikdârı ve yüz altmış keyl şa‘îr ve yüz seksen beş keyl alef ve ber-mûceb-i defter-i müfred[â]t çiftlik-i mezkûrun âlât-ı ma‘lûmesinin nısf-ı şâyi‘i benim mülküm olmağla çiftlik-i merkūmun büyût-ı adîdeyi müştemil mülk menzilin nısf-ı şâyi‘i ile derûnunda mevcûd olup zikrleri mürûr eden eşyânın nısflarını tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin vâlidim mûmâ-ileyh el-Hâc Ebubekir Efendi’ye üç yüz guruşa bey‘ u teslîm eylediğimde ol dahi ber-vech-i muharrer iştirâ ve teslîm [tesellüm] ve kabûl eyledikden sonra semeni olan meblağ-ı merkūm üç yüz guruşu yedinden tamâmen ahz [u] kabz eyledim ba‘de’l-yevm çiftlik-i mezkûrda benim kat‘â alâka ve medhalim kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-Zilka‘deti’ş-şerîfe li-seneti hamsîn ve mi’ete ve elf. Şuhûdü’l-hâl: Hatib Mehmed Efendi b. ( ), İmâm Mehmed Efendi b. ( ), Ahmed Ağa el-Haseki b. ( ), Yakub Ağa b. Mehmed, Molla Hüseyin b. ( ).