Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 59 Hüküm no: 23 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Efendi’nin İznikmid kazasında bulunan Musa çiftliğindeki yarım hissesi ile bazı eşya ve hayvanları eşi Ayşe Hanım’a sattığı Medîne-i Üsküdar’da Toygar Hamza mahallesinde sâkin fahrü’l-ulemâ’i’l-kirâm el-Hâc Ebubekir Efendi b. Ali Bey nâm kimesne meclis-i şer‘-i şerîf-i enverde halîlesi olup zâtı zeyl-i sahîfede muharrerü’l-esâmî Müslimîn ta‘rîfleriyle mu‘arrefe olan işbu sâhibetü’l-kitâb Şerife Âişe Hatun bt. Mehmed Ağa mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup vilâyet-i Anadolu’da medîne-i İznikmid kazâsında vâki‘ Evrenkös hudûdu dâhilinde Hasyerleri demekle ma‘rûf mevzi‘de kâin lede’l-ahâlî ma‘lûmü’l-hudûd ve’l-müştemilât olup Kadı Musa köyü nâm-ı diğer Musa çiftliği demekle şehîr olan çiftliğin büyût-ı adîdeyi müştemil mülk menzilin nısf-ı şâyi‘i ile derûn-ı çiftlik-i mezkûrda mevcûd yirmi re’s camus ineği ve elli vakıyye evân-ı nühâs ve otuz yedi çit saman ve iki yüz keyl mikdârı ve yüz altmış keyl şa‘îr ve yüz seksen beş keyl alef ve ber-mûceb-i defter-i müfredât çiftlik-i mezkûrun âlât-ı ma‘lûmesinin nısf-ı şâyi‘ini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem mezbûre Şerife Âişe Hatun’a bi-safkatin vâhidetin üç yüz kırk guruşa bey‘ ü temlîk ve mahallinde kabza taslît eylediğimde ol dahi ber-vech-i muharrer iştirâ ve kabûl eyledikden sonra semeni olan meblağ-ı mârrü’z-zikr üç yüz kırk guruş [8a] mutâlebesinden mezbûre Şerife Âişe Hatun’un zimmetini ibrâ-i âmm-ı katı‘ü’n-nizâ‘la ibrâ ve iskāt eyledim ba‘de’l-yevm çiftlik-i mezkûr ile derûnunda mevcûd olup zikri mürûr eden inek, buğday ve şa‘îr ve alef ve saman ve evânî nühâs ve âlât-ı ma‘lûmenin ve menzil-i merkūmun nısf-ı şâyi‘i mezbûre Şerife Âişe Hatun’un mülk-i müşterâsı olmuşdur keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-Zilka‘deti’ş-şerîfe li-seneti tis‘a ve erba‘în ve mi’ete ve elf. Şuhûdü’l-hâl: Yakub Ağa b. Mehmed, Ahmed Ağa Haseki b. ( ), Hatib Mehmed Efendi b. ( ), Berber el-Hâc Mustafa b. ( ), Molla Hüseyin b. ( ).