Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 60 Hüküm no: 24 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hanım’ın boşandığı kocası Ali ile her konuda anlaşıp alacaklarını tahsil ettiği Medîne-i Üsküdar’da Hamza Fakıh mahallesinde sâkine ve zâtı Ahmed [b.] Mehmed ve Hasan b. Ramazan nâm kimesneler ta‘rîfleriyle mu‘arrefe olan Hanife bt. Abdullah nâm hatun meclis-i şer‘-i hatîrde zevc-i dâhili işbu râfi‘ü’l-kitâb Ali b. Hüseyin nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr Ali târîh-i kitâb günü beni bâyinen tatlîk etmekle zimmetinde mütekarrir ve ma‘kūdun-aleyh olan bin akçe mehr-i müeccelim ile nafaka-i iddet-i ma‘lûme ve me’ûnet-i süknâm için bi’t-terâzi iki yüz kırk akçe ki min-haysü’l-mecmû‘ bin iki yüz kırk akçeyi zevcim mezbûr Ali bana def‘ ü teslîm eyledikde ben dahi yedinden tamâmen ahz u kabz eyledim fî-mâ ba‘d zevcim mezbûr ile hukūk-ı zevciyete müte‘allıka da‘vâ ve nizâ‘ım kalmamışdır dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Osman b. ( ), es-Seyyid Süleyman b. Mehmed, Mehmed Bey b. ( ), Veli Bey b. Mehmed, Mustafa Bey b. Ahmed, İsa Bey b. Musa.