Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 61 Hüküm no: 25 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hanım’ın kendisini terk eden kocası Hüseyin’in öldüğü anlaşıldığından kayınpederinden nafaka talebinde bulunmasının geçerli olmadığı Medîne-i Üsküdar’da Arakiyyeci el-Hâc Mehmed mahallesi sâkinelerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Afife bt. Yusuf nâm hatun meclis-i şer‘-i şerîf-i enverde işbu sâhibü’l-vesîka kaynatası Hasan Çelebi b. Mehmed nâm kimesne mahzarında üzerine da‘vâ ve takrîr-i kelâm edip mezbûr Hasan Çelebi’nin sulbî kebîr oğlu Hüseyin nâm kimesne benim zevcim olup târîh-i kitâbdan iki buçuk sene mukaddem beni bilâ-nafaka terk edip diyâr-ı âhara gider oldukda babası mezbûr Hasan Çelebi’yi nafakam için irâet edip mezbûr Hasan Çelebi dahi nafakamı rü’yet etmeye ta‘ahhüd ve tekeffül eyledikden sonra bir müddet beni infâk dahi edip hâlâ iki seneden beri infâka ta‘allül eder suâl olunup yine nafakamı rü’yete tenbîh olunmak matlûbumdur dedikde gıbbe’s-suâl mezbûr Hasan Çelebi fi’l-hakīka müdde‘iyye-i mezbûrenin iddi‘â eylediği minvâl üzere olduğunu ikrâr lâkin müdde‘iyye-i mezbûrenin zevci Hüseyin Bey yüz kırk sekiz senesi Rebî‘ülevveli’nde mahmiye-i İstanbul’da Kebeciler Hanı’nda sâkin iken fevt olmağla târîh-i mezbûrdan beri müdde‘iyye-i mezbûrenin nafakasında zimmetim berî olmuşdur deyü def‘-i mezkûru mukābele edicek gıbbe’l-istintâk ve’l-inkâr mezbûr Hasan Çelebi’nin def‘-i mezkûrunu mübeyyine beyyine taleb olundukda udûl-ı Müslimînden olup Hâfız Ahmed Efendi b. Veli ve Mehmed Ağa b. Mustafa nâm kimesneler meclis-i şer‘a hâzırân olup istişhâd olunduklarından sonra mezbûre Afife’nin zevci Hüseyin b. el-mezbûr Hasan Çelebi b. Mahmud [Mehmed] nâm kimesne bin yüz kırk sekiz senesi Rebî‘ülevveli’nde mahmiye-i İstanbul’da Kebeciler Han’ı demekle ma‘rûf handa sâkin iken bi-emrillâhi te‘âlâ vefât edip hattâ bizler cenâzesini rü’yet ve [8b] ve salâtına hâzırlar olup cemâ‘at-i Müslimîn ile defn eyledik biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mezbûr Hüseyin’in fevti sâbit olmağla mezbûre Afife nafaka talebiyle bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Hâfız Ahmed Efendi b. Veli, Mehmed Ağa b. Mustafa, Veli Ağa b. Mehmed, es-Seyyid Süleyman b. Mehmed, İsa Bey b. Musa, Mehmed Bey b. Halil.