Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 61 Hüküm no: 26 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi’nin kendisinden aldığı iki yüz dokuz kuruş borcunu inkâr eden Hatice Hanım ile yüz elli kuruş karşılığında sulh olduğu Medîne-i Üsküdar’da Câmi‘-i Kebîr mahallesi sâkinlerinden Ali Çelebi b. Mehmed nâm kimesne meclis-i şer‘-i şerîf-i enverde zâtı Mustafa Beşe b. el-Hâc Ali ve Ömer Ağa b. Hasan nâm kimesneler ta‘rîfleriyle mu‘arrefe olan işbu râfi‘atü’l-vesîka Hadîce bt. Osman nâm hatun mahzarında ikrâr ve takrîr-i kelâm edip mezbûre Hadîce târîh-i kitâbdan altı ay mukaddem yedimden istikrâz ve kabz ve mesârifine sarfla istihlâk eylediği iki yüz dokuz guruş hakkımı bundan akdem mezbûre Hadîce’den taleb ve da‘vâ ve müdde‘âmı isbât sadedinde olduğumda ol dahi bi’l-külliye inkâr etmekle beynimizde münâza‘ât-ı kesîre vâkı‘a olmuşidi el-hâletü hâzihi beynimize muslihûn tavassut edip beni da‘vâ-yı mezkûremden mezbûre Hadîce ile an-inkârin yüz elli guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı merkūm yüz elli guruşu yedinden tamâmen ahz u kabz eyledim fî-mâ ba‘d husûs-ı mezbûra müte‘allıka âmme-i da‘vâ ve kâffe-i mutâlebâtdan mezbûre Hadîce’nin zimmetini ibrâ ve iskāt eylediğimde ol dahi bedel-i sulh olmak üzere medfû‘u olan meblağ-ı merkūm yüz elli guruş mutâlebesinden kezâlik benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî min-Şa‘bân li-seneti hamsîn ve mi’ete ve elf. Şuhûdü’l-hâl: Ahmed Beşe b. Şa‘bân, Süleyman b. Mehmed, Berber Mustafa b. Ahmed, Mukayyid Mustafa Efendi b. Mehmed, Mehmed Efendi b. Ahmed, Ömer Ağa b. Hasan, el-Hâc Ali b. ( ), Veli Bey b. Mehmed, Hasan Bey b. Ramazan, Mehmed Bey b. ( ). Ali Ağa b. ( ), Ali b. Ahmed.