Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 62 Hüküm no: 27 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Pehlivanzade Süleyman’ın Fazlı Usta’ya olan borcunun terekesinden ödenmesi Medîne-i Üsküdar’da Evliyâ Hoca mahallesinde sâkin iken bundan akdem fevt olan Pehlivanzâde demekle şehîr Süleyman b. el-Hâc Mehmed b. Mustafa’nın verâseti anası Bektaş Hatun bt. Abdullah ve sulbiye sagīre kızı Saliha’ya ve li-ebeveyn er karındaşları Mustafa ve Hüseyin’e münhasıra olduğu şer‘an tahakkukundan sonra müteveffâ-yı mezbûrun üvey babası işbu râfi‘ü’l-vesîka Fazlı Usta b. Mustafa nâm kimesne meclis-i şer‘-i hatîrde sagīre-i mezbûre Saliha’nın tesviye-i emrine bâ-hüccet-i şer‘iyye vasiyesi olmağla tereke-i müteveffâ-yı mezbûra bi’l-verâse ve bi’l-vesâye vâzı‘u’l-yed olan mezbûre Bektaş Hatun muvâcehesinde üzerine da‘vâ ve takrîr-i kelâm edip müteveffâ-yı mezbûr Süleyman b. el-Hâc Mehmed b. Mustafa hâl-i hayâtında işbu yedimde olan mümzâ ve <> mahtûm temessük mantûkunca bin yüz kırk sekiz senesi Zilhiccesi’nin [9a] on beşinci gününden mâlımdan beş yüz otuz üç guruş istikrâz edip mesârifine sarfla istihlâk eyledikden sonra kable’l-edâ fevt olmağla tereke-i vâfiyesinden taleb ederim suâl olunsun dedikde gıbbe’t-tasdîkı’s-suâl mezbûre Bektaş Hatun cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr lâkin müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden medîne-i mezbûr[da] Hacce Hatun mahallesinde sâkin Ali Çelebi b. Mustafa ve diğer Ali Çelebi b. Arslan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Pehlivanzâde demekle şehîr Süleyman b. el-Hâc Mehmed b. Mustafa hâl-i hayâtında işbu mümzâ ve mahtûm temessük mantûkunca bin yüz kırk sekiz senesi Zilhiccesi’nin on beşinci gününde işbu müdde‘î-i mezbûr Fazlı Usta yedinden beş yüz otuz üç guruşu bizim huzûrumuzda istikrâz edip ilâ-zamâni vefâtihî zimmetinde kaldı biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm meblağ-ı merkūm beş yüz otuz üç guruşu terekesinden edâya tenbîh birle mâ-vaka‘a bi’t-taleb ketb olundu. Min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Mustafa Bey b. Ahmed, Veli Bey b. Mehmed, diğer Mehmed Efendi b. Hasan, Mehmed Efendi b. Ahmed, İsa Bey b. Musa.