Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 63 Hüküm no: 28 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep Hanım’ın eşi Mehmed’den muhâlaa yoluyla boşandığı Medîne-i Üsküdar’da Hacce Hatun mahallesi sâkinelerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Zeyneb bt. Hüseyin nâm hatun meclis-i şer‘-i şerîf-i enverde zevc-i muhâlı‘ı işbu râfi‘ü’l-vesîka Mehmed b. Hüseyin nâm kimesne mahzarında ikrâr ve takrîr-i kelâm edip mezbûr Mehmed zevcim olup beynimizde hüsn-i zindegânemiz olmayıp ben hul‘a tâlibe olduğum ecilden mezbûrun zimmetinde mütekarrir [ve] ma‘kūdun-aleyh olan bin altı yüz akçe mehr-i müeccelimden nafaka-i iddet-i ma‘lûmemden fâriğa olup ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve kendi medfû‘um olan iki bohça çamaşıra müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ-i âmm-ı katı‘ü’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: eş-Şeyh İbrahim Efendi b. Yahya, Ali Efendi b. Ahmed, Osman Çelebi b. <> Mustafa, Ahmed Beşe b. Mehmed, el-Hâc Saki b. Osman, es-Seyyid Halil Beşe b. İbrahim, Mehmed b. Mustafa, İsmail Ağa b. Veli, Mehmed Beşe b. Nuh.