Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 64 Hüküm no: 29 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım ve kardeşlerinin menzil hisselerini Arife ve Emine hanımlara sattıkları Medîne-i Üsküdar’da Atîk Vâlide Sultan mahallesinde vâki‘ etrâf-ı erba‘ası Selîme Hatun ve Abdüllatif Çelebi ve Arap ve Yağcı el-Hâc Mustafa mülkleri ve tarîk-i âm ile mahdûd fevkānî iki bâb oda ve köşk ve bir mağsel ve âbdesthâne ve kenîf ve tahtânî iki bâb oda ve kiler ve bir matbah ve kenîf ve iki bi’r-i mâ ve ahır ve eşcâr-ı müsmire ve gayri müsmireyi hâvî bahçeyi müştemil bir bâb mülk menzil beş hisse i‘tibârıyla iki hissesi Feyzullah Çelebi ve iki hissesi Nurullah Çelebi ve bir hissesi Âişe Hatun ebnâ’i’l-merhûm Hüseyin Efendi nâm karındaşların mülkleri olmağla ilâ-hîni sudûrı hâze’l-akd yedlerinde ber-vech-i muharrer mülkleri ve hakk-ı sırfları olduğu lede’ş-şer‘i’l-enver müte‘ayyin oldukdan sonra kendi taraflarından asıl ve kız karındaşı mezbûre Âişe tarafından husûs-ı câi’z-zikre vekîli olduğu zât-ı mezbûreyi bi’l-ma‘rifeti’ş-şer‘iyye ârifân el-Hâc İsmail Efendi b. Ahmed ve Molla Mehmed b. Mustafa nâm kimesneler şehâdetleriyle mazharında [mahzar-ı] hasm-ı şer‘îde şer‘an sâbit ve sübût-ı vekâletine hükm-i şer‘î lâhık olan mezbûr Feyzullah Çelebi asâleten [ve] vekâleten ve merkūm Nurullah Çelebi dahi asâleten meclis-i şer‘-i şerîf-i enverde işbu râfi‘ateyü’l-vesîka Ârife bt. Ahmed ve Emine bt. Mehmed nâm hatunların taraflarından husûs-ı âti’l-beyânı tasdîka vekîl-i müseccel-i şer‘îleri olan Mehmed Ağa b. Mehmed nâm kimesne mahzarında her biri ikrâr ve takrîr-i kelâm edip menzil-i mahdûd-ı mezkûru tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi’l-asâle ve bi’l-vekâle mezbûretân Ârife ve Emine’ye beş yüz elli beş guruşa bey‘ [u] teslîm ve temlîk eylediğimizde onlar dahi ale’l-iştirâki’s-seviyy iştirâ ve tesellüm ve temellük [ve] kabûl eylediklerinden sonra semeni olan meblağ-ı merkūm beş yüz elli beş guruşu mezbûretân Ârife ve Emine yedlerinden her birimiz bi-kadri’l-hısâs-ı mezkûre asâleten ve vekâleten bi’t-tamâm ve’l-kemâl ahz [u] kabz eyledik mezbûretân Ârife ve Emine’nin ale’l-iştirâki’s-seviyy mülk-i müşterâsı ve hakk-ı sırfları olup gerek bizim ve gerek müvekkilem mezbûre Âişe Hatun’un kat‘â alâka ve medhalimiz kalmamışdır dediklerinde gıbbe’t-tasdîk mâ hüve’l-vâki‘ bi’t-taleb ketb olundu. Min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Ali Efendi b. Ahmed, İsmail Efendi b. Ahmed, Mehmed Çelebi b. Nuh, Diğer Mehmed b. Mustafa, Diğer Ahmed Ağa b. ( ), eş-Şeyh İbrahim Efendi b. eş-Şeyh Yahya Efendi, Mustafa b. Hasan, Süleyman b. Abdullah.