Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 65 Hüküm no: 30 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elike bt. Kazer Nasraniyenin kocasından muhâlaa yoluyla boşandığı Medîne-i Üsküdar’da Yenimahalle sâkinelerinden olup zât-ı Pabuk v. Asvador ve Pabuk v. Kazer nâm zimmîler ta‘rîfleriyle mu‘arrefe olan Elike bt. Kazer nâm Nasrâniye meclis-i şer‘-i şerîf-i enverde zevc-i muhâlı‘ı işbu râfi‘ü’s-sifr Norsez v. Pabuk nâm zimmî muvâcehesinde ikrâr ve takrîr-i kelâm edip mezbûr Norsez zevcim olup beynimizde hüsn-i zindegânemiz olmayıp ben hul‘a tâlibe olduğum ecilden mezbûrun zimmetinde mütekarrir [ve] ma‘kūdun-aleyh olan işbu beş yüz akçe mehr-i müeccelimden ve nafaka-i iddet-i ma‘lûmemden fâriğa olup ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye [ile] muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ-i âmm-ı katı‘ü’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Veli Bey b. Mehmed, Hasan Bey b. Ramazan, Mehmed Bey b. Halil, Osman Bey b. Hasan.