Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 65 Hüküm no: 31 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Mustafa’nın evini Yusuf Bey’e sattığı Medîne-i Üsküdar’da Bulgurlu mahallesi sâkinlerinden el-Hâc Halil b. Mustafa nâm kimesne meclis-i şer‘-i şerîf-i enverde işbu sâhibü’l-vesîka Yusuf Bey b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik emlâkimden olup mahalle-i mezbûrede vâki‘ bir tarafdan müşteri-yi mezbûr mülkü ve bir tarafdan Ali Ağa odaları ve bir tarafdan vâdi ve bir tarafdan tarîk-i âm ile mahdûd dâhiliyede iki bâb fevkānî oda ve üç sofa ve tahte’s-semâ ve tahtânî bir oda ve bir hamam ve câmekân ve iki bi’r-i mâ ve üç kenîf ve zât-ı eşcâr-ı müsmire ve gayr-ı müsmire bahçe ve hâriciyesinde üç bâb fevkānî oda ve bi’r-i mâ ve kenîf ve ahırı müştemil mülk menzilimi bi’l-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile sekiz yüz elli guruşa mezbûr Yusuf Bey’e bey‘ ü temlîk ve teslîm eyledikden sonra semeni olan meblağ-ı merkūm sekiz yüz elli guruşu müşteri-yi merkūm Yusuf Bey yedinden bi’t-tamâm ve’l-kemâl ahz [u] kabz eyledim menzil-i mahdûd-ı mezkûrun tagrîr ve gabn-ı fâhiş da‘vâsına müte‘allıka âmme-i de‘âvîden mezbûrun zimmetini ibrâ ve iskāt eyledim ba‘de’l-yevm benim alâka ve medhalim kalmayıp mezbûr Yusuf Bey’in mülk-i müşterâsı ve hakk-ı sırfları olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Ali Ağa b. Ömer, Hâfız Ömer Efendi b. Ali Ağa, Hâfız Osman b. Ali Ağa, İbrahim Odabaşı b. Mehmed, Veli Bey b. Osman.