Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 66 Hüküm no: 33 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hanım’ın eşi Feyzullah’dan muhâlaa yoluyla boşandığı Medîne-i Üsküdar’da Hacce Hatun mahallesinde sâkine ve zâtı Ahmed b. Mehmed ve Mehmed b. Ali nâm kimesneler ta‘rîfleriyle mu‘arrefe olan Fâtıma bt. Osman nâm hatun meclis-i şer‘-i hatîrde zevc-i dâhili işbu râfi‘ü’l-kitâb el-Hâc Feyzullah b. Mustafa nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr el-Hâc Feyzullah ile beynimizde hüsn-i mu‘âşe[reti]miz olmamağla ben [hul‘a] tâlibe olduğum ecilden zimmetinde mütekarrir ve ma‘kūdün-aleyh olan bin akçe mehr-i müeccelimden fâriğa olup nafaka-i iddet-i ma‘lûmemden [ma‘lûmem] ve me’ûnet-i süknâm dahi kendi üzerime olup mezbûrun firâşından nâşi hamlim zuhûr eder ise vaz‘-ı haml edinceye değin nafaka-i hamlim dahi kendi üzerime olmak üzere zevcim merkūm Feyzullah ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i [muharrer] hul‘u kabûl [ve] hukūk-ı zevciyete müte‘allıka âmme-i de‘âvîden her birimiz âharın zimmetini ibrâ eyledikde ve iskāt eyledim bi’l-külliye dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. [Fî sene] 115[0] Şuhûdü’l-hâl: İsa Bey b. Musa, Veli Bey b. Mehmed, Hasan Bey b. Ramazan, Mustafa Bey b. Halil.