Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 68 Hüküm no: 37 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hanım’ın eşi Mustafa Beşe’den muhâlaa yoluyla boşandığı Medîne-i Üsküdar’da Vâlide-i Atîk mahallesi sâkinelerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Ümmühani bt. Ömer nâm hatun meclis-i şer‘-i şerîf-i enverde zevc-i muhâlı‘ı işbu sâhibü’l-vesîka Mustafa Beşe b. Abdullah nâm kimesne mahzarında ikrâr ve takrîr-i kelâm edip mezbûr Mustafa Beşe zevcim olup beynimizde hüsn-i zindegânemiz olmayıp ben hul‘a tâlibe olduğum ecilden mezbûrun zimmetinde mütekarrir ve ma‘kūdün-aleyh olan bin iki yüz akçe mehr-i müeccelimi kendüye deynim olan yirmi beş guruşun on guruşuna takas eylediğimde ol dahi mukāssa ve kabûl eyledikden sonra nafaka-i iddet-i ma‘lûmemden fâriğa olup ve me’ûnet-i süknâm dahi kendi üzerime olmak üzere zevcim mezbûr Mustafa Beşe ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i [muharrer] hul‘-ı mezbûru ba‘de’l-kabûl hukūk-ı zevciyete müte‘allıka âmme-i de‘âvî ve kâffe-i mutâlebâtdan ve eymân [ve] muhâsamâtdan her birimiz âharın zimmetini ibrâ-i âmm-ı katı‘ü’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min-şehri Recebi’l-ferd li-seneti hamsîn ve mi’ete ve elf. Şuhûdü’l-hâl: Veli Ağa b. Mehmed, Mustafa Ağa b. Ahmed, es-Seyyid Süleyman b. Mehmed, Hasan Bey b. Ramazan, Mehmed Bey b. Halil.