Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 69 Hüküm no: 39 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un eşi Mustafa Beşe’den muhâlaa yoluyla boşandığı Medîne-i Üsküdar’a tâbi‘ Bulgurlu karyesi sâkinelerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Ümmügülsüm bt. Abdullah nâm hatun meclis-i şer‘-i şerîf-i enverde zevc-i muhâlı‘ı işbu sâhibü’l-vesîka Mustafa Beşe b. el-Hâc Ahmed nâm kimesne mahzarında ikrâr ve takrîr-i kelâm edip mezbûr Mustafa Beşe zevcim olup beynimizde hüsn-i zindegânemiz olmayıp ben [hul‘a] tâlibe olduğum ecilden mezbûrun zimmetinde mütekarrir ve ma‘kūdün-aleyh olan altı bin beş yüz akçe mehr-i müeccelimden ve nafaka-i iddet-i ma‘lûmemden fâriğa olup ve me’ûnet-i süknâm dahi kendi üzerime olmak üzere zevcim mezbûr Mustafa Beşe ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâir beynimizde cereyân eden ahz u kabz ve i‘tâya mu[‘â]melât-ı şettâya ve sâire müte‘allıka âmme-i de‘âvî ve kâffe-i mutâlebât [ve] eymân [ve] muhâsamâtdan her birimiz âharın zimmetini ibrâ-i âmm-ı katı‘ü’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min-şehri Ramazani’l-mübârek li-seneti hamsîn ve mi’ete ve elf. Şuhûdü’l-hâl: Ali Beşe b. Ahmed, Mustafa Beşe b. Mehmed, Hasan Beşe b. Mehmed, Veli Ağa b. Mehmed, Hasan Bey b. Ramazan, es-Seyyid Süleyman Bey b. Mehmed, Mehmed Bey b. Halil, Ali Bey b. Nuh.