Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 70 Hüküm no: 40 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maskonya bt. İsteraki’nin uhdesindeki bir sehm mahzen hissesini oğluna sattığı Medîne-i Üsküdar’a muzâfe Adalar nâhiyesine tâbi‘ Heybeliadası sâkinelerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Maskonya bt. İsteraki nâm Nasrâniye meclis-i şer‘-i şerîf-i enverde işbu râfi‘ü’s-sifr kebîr oğlu Sava v. ( ) nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup ada-i mezbûrede vâki‘ bir tarafdan Yorgi zimmî mülkü ve bir tarafdan leb-i deryâ ve bir tarafdan Çavuşlu mülkü ve bir tarafdan tarîk-i âm ile mahdûd bir bâb fevkānî oda ve tahtında bir bâb mahzen ve bir mikdâr havluyu müştemil mahzen üç sehm i‘tibârıyla iki sehmi oğlum mesfûr Sava’nın mülkü olup ve bir <> sehmi benim mülküm olmağla ben bir hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa oğlum mesfû[r] Seva’ya bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz guruşu oğlum mesfûr Sava yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden mahzende olan bir sehm hisse-i şâyi‘amda benim kat‘â alâka ve medhalim kalmayıp mecmû‘-ı mahzen oğlum mesfûrun mülk-i müşterâsı ve hakk-ı sırfı olmuşdur [12b] keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min-şehri Ramazani’l-mübârek li-seneti hamsîn ve mi’ete ve elf. Şuhûdü’l-hâl: es-Seyyid İbrahim Çelebi b. Mustafa, Mahmud Beşe b. Süleyman, Veli Bey b. Mehmed, Hasan Bey b. Ramazan, Mehmed Bey b. Halil.