Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 70 Hüküm no: 41 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Çelebi’nin bağını Mehmed Ağa’ya sattığı Mahmiye-i İstanbul’da Çukurhamam kurbünde sâkin el-Hâc Halil Çelebi b. Mustafa b. Abdülmennan tarafından ber-vech-i âtî ikrâra vekîl olduğu el-Hâc Mustafa b. el-Hâc Ali ve Mehmed Çelebi b. el-Hâc Abdullah nâm kimesneler şehâdetleriyle şer‘an sâbit olan Süleyman Ağa b. Osman nâm kimesne medîne-i Üsküdar’da meclis-i şer‘-i şerîf-i enverde işbu râfi‘ü’l-kitâb Mehmed Ağa b. ( ) nâm kimesne tarafından ber-vech-i âtî tasdîka vekîl-i müsecceli olan Hasan Ağa b. Abdullah nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin silk-i mülkümde [münselik] emlâkimden olup medîne-i mezbûra tâbi‘ Çengar (Çengel) karyesi hâricinde Kaldırım nâm mahâlde vâki‘ bir tarafdan Kocaoğlu bağı ve bir tarafdan Cebeci Süleyman bağı ve bir tarafdan Kadinyo bağı ve bir tarafdan tarîk-i âm ile mahdûd bir kıt‘a kürûmu mülk bağını tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr Mehmed Ağa’ya yüz guruşa bey‘ ü temlîk ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz guruşu müvekkil-i merkūm Mehmed Ağa yedinden bi’t-tamâm ve’l-kemâl ahz u kabz eyledi ba‘de’l-yevm zikri mürûr eden bağ-ı mahdûd-ı mezkûrda müvekkilim mezbûr Halil Çelebi’nin kat‘â alâka ve medhali kalmadı müvekkil-i mezbûr Mehmed Ağa’nın mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-şehri Ramazani’l-mübârek li-seneti hamsîn ve mi’ete ve elf. Şuhûdü’l-hâl: Osman Beşe b. Abdullah, İsmail Beşe b. Yusuf, Mehmed Ağa b. Abdullah, Veli Ağa b. Mehmed, el-Hâc Mustafa b. el-Hâc Ali, Hasan Bey b. Ramazan, Mehmed Bey b. ( ).