Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 71 Hüküm no: 42 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe’nin kendisini bıçakla yaralayan Ahmed ile sulh olduğu Medîne-i Üsküdar’da Balaban İskelesi kurbünde bekâr odalarında sâkin olup ber-vech-i âtî mecrûh olan Kayıkçı Hüseyin Beşe b. Hasan b. Abdülmennan nâm kimesne tarafından ber-vech-i âtî sulh ve ibrâya vekîli olduğu Hasan Çelebi b. Abdullah ve Hüseyin Beşe b. Mehmed nâm kimesneler şehâdetleriyle şer‘an sâbit olan Abdi Beşe b. Mehmed nâm kimesne meclis-i şer‘-i şerîf-i enverde işbu râfi‘ü’l-vesîka Ahmed b. Abdullah b. Abdülkerim tarafından husûs-ı âti’z-zikri tasdîka vekîl-i müsecceli Hüseyin Beşe b. Hızır [13a] nâm kimesne mahzarında bi’l-vekâle ikrâr ve takrîr-i kelâm edip mezbûr Ahmed târîh-i kitâbdan üç gün mukaddem ba‘de’z-zuhr Balaban İskelesi’nde müvekkilim mezbûr Hüseyin Beşe’nin bi-gayr-ı hakkın amden bıçak ile sol elinin bileği üzerine ve kalçası üzerine iki mahallinden darb ve cerh etmekle mûcib-i şer‘îsini taleb ve da‘vâ sadedinde olduğunda ol dahi inkâr etmekle beynlerinde münâza‘ât-ı kesîre vâkı‘a olmuşidi el-hâletü hâzihi beynlerine muslihûn tavassut edip müvekkilim mezbûr Hüseyin’i da‘vâsından merkūm Ahmed ile an-inkârin altı guruş üzerine inşâ-i akd-i sulh eylediklerinde ol dahi sulhü kabûl ve bedel-i sulh olan meblağ-ı merkūm altı guruşu yedinden tamâmen ahz [u] kabz eyledim ve her birimiz âmme-i da‘vâdan ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. [sene] 1150 Şuhûdü’l-hâl: Hüseyin Çelebi b. Abdullah, Hüseyin Beşe b. Mehmed, Veli Ağa b. Mehmed, Hasan Bey [b.] Ramazan.