Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 72 Hüküm no: 43 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Ahmed’in damadı tarafından tüfek kurşunuyla yaralandığının tespit edildiği Husûs-ı âti’l-beyânın mahallinde ketb ü tahrîri’çün savb-ı şer‘-i enverden me’zûnen irsâl olunan Mevlânâ Ahmed Efendi b. Hüseyin Efendi medîne-i Üsküdar’da Davudpaşa mahallesinde vâki‘ Abdi Reis menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘ ettikde menzil-i merkūmda ber-vech-i âtî mecrûh bulunan el-Hâc Hasan b. Ahmed b. Hasan meclis-i şer‘-i ma‘kūd-ı mezkûrda bast-ı kelâm ve ifâde-i merâm edip gāib ani’l-beled dâmâdı[m] Balabanoğlu İbrahim kızım ile işbu menzilde müste’ciren sâkin olmalarıyla dâmâdım mezbûr kızım mezbûreye cevr ü eziyet eylediğine binâen târîh-i kitâb günü menzil-i merkūma gelip niçin [birbirinizle]? kavgalısınız dediğimde dâmâdım an-gāib-i merkūm Balabanoğlu İbrahim târîh-i kitâb günü tüfenk ile üzerime hücûm ve tüfenk kurşunu ile nehâren işbu sağ elim ve göbeğim altına amden darb ve cerh ve hâlâ mecrûh eylemişdir cerh-i mezkûrdan müteessiren bi-emrillâhi te‘âlâ fevt olursam gerek menzil-i merkūm sâhibi ve gerek menzil-i merkūmda olunan [kavga] ile husûs-ı merkūma müte‘allıka vechen mine’l-vücûh da‘vâ ve husûmetim olmayıp cârihim dâmâdım Balabanoğlu gāib-i merkūm İbrahimdir dedikde mecrûh-ı mezbûrun a‘zâsına nazar eylediklerinde fi’l-hakīka sağ elinin parmakları ve göbeği altında tüfenk kurşunu ile mecrûh bulunduğunu ba‘de’l-keşf ve’l-mu‘âyene vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr Ömer b. Hüseyin Muhzır Hasan ile meclis-i şer‘a gelip alâ-vukū‘ihi inhâ ve ihbâr etmeğin mâ-vaka‘a bi’t-taleb ketb olundu. Min-şehri Ramazan li-seneti hamsîn ve mi’ete ve elf. Şuhûdü’l-hâl: Derviş İbrahim b. Mehmed, İbrahim Beşe b. Osman, Ömer Bey b. Hüseyin, Mehmed Beşe b. Abdullah, Veli Bey b. Mehmed, Hasan Bey b. Ramazan.