Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 655 Hüküm no: 1049 Orijinal metin no: [85b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacılar Kethudası İbrahim Ağa’nın Mehmed b. İsmail’den aldığı beygirin ayıplı olduğunu önceden bildiği Ma‘rûz; Medîne-i Üsküdar’da Hasanağa mahallesinde sâkin Arabacılar Kethudâsı İbrahim Ağa b. Mehmed mahfil-i bâbda meclis-i şer‘-i hatîrde Mehmed b. İsmail mahzarında mezbûr Mehmed’den târih-i i‘lâmdan beş gün mukaddem işbu meclis-i şer‘de mu‘âyene olunan bir re’s yağız bârgirini cemî‘ uyûbdan sâlime olmak üzere elli beş guruş semen-i medfû‘a iştirâ edip lâkin bârgir-i merkūmun inde’t-tüccâr noksân-ı semen îcâb eder sakağı ve sarıca illetleriyle mu‘ayyeb olmağla bârgir-i merkūmu red ve semen nâmıyla medfû‘um olan elli beş guruşu mezbûr Mehmed’den istirdâd ederim deyü da‘vâ, ol dahi cevâbında bârgir-i merkūmun sarıca illetiyle mu‘ayyeb olduğu hâlde bey‘ eylediğimde müdde‘î-i mezbûr İbrahim Ağa dahi ayb-ı mezkûr ile kabz ve kabûl etmiş idi deyü eylediği def‘ini mezbûr İbrahim Ağa ikrâr ü i‘tirâf etmeğin mûcebiyle müdde‘î-i mezbûr İbrahim Ağa mezbûr Mehmed içün bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 19 min-R sene 1206