Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 656 Hüküm no: 1051 Orijinal metin no: [85b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in borcunu ödemesi Ma‘rûz; Medîne-i Üsküdar’da Davudpaşa mahallesinde sâkin Ebûbekir b. Mehmed meclis-i şer‘-i hatîrde Mustafa b. Mehmed mahzarında mezbûr Mustafa bundan akdem gāibûn ani’l-meclis Halil ve Hacıoğlu Mustafa ve Osman ve es-Seyyid Ebûbekir ve Yoğurtcu Ahmed nâm kimesneler mâ‘an yedimden iştirâ ve kabz eyledikleri aded ve fiyâtı beynimizde ma‘lûm ganem semeninden yüz doksan guruş zimmetlerinde hakkım olmağla mezbûrûndan her biri âharın zimmetine lâzım gelen meblağa kefîl ve dâmin oldukdan sonra meblağ-ı merkūm deynleri olduğunu müş‘ir karz ünvânıyla yedime bir kıt‘a temessük i‘tâ etmeleriyle meblağ-ı merkūmdan mezbûr Mustafa’nın hissesine isâbet eden otuz bir guruş otuz para hakkımı taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm otuz bir guruş otuz paranın edâsıyla mezbûr Mustafa şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 16 min-C sene 1205 Hatmü’l-ma‘rûzâti’l-müseccele bi-tevfîkı şâri‘i’l-akzıyyeti’l-müdellele Abduhû es-Seyyid Ömer [86a Boş]