Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 657 Hüküm no: 1053 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Artin’in kendisini bıçakla yaralayan Mehmed b. Ali ile sulh olduğu Ma‘rûz; Medîne-i Üsküdar’da Selami mahallesinde sâkin ve ber-vech-i âtî bıçak yarasıyla mecrûh idiği lede’l-keşf ve’l-mu‘âyene zâhir olan Avanis v. Artin nâm zimmî medîne-i mezbûrede mahfil-i bâbda meclis-i şer‘-i hatîrde Mehmed b. Ali mahzarında mezbûr Mehmed târih-i i‘lâmdan bir gün mukaddem mahalle-i mezbûrede vâki‘ Elmiye? zimmî bağçesinde vakt-i asrda bi-gayrı hakkın amden beni sağ uyluğum üzerinden bıçak ile darb ve cerh etmekle mûcib-i şer‘îsini taleb ederim deyü eylediği da‘vâsından bâ-tavassut-ı muslihîn beş guruş bedel-i makbûz mukābelesinde mezbûr Mehmed ile sulh olup cerh-i mezkûra ve mâ yuhdesü minhe müte‘allika âmme-i de‘âvîden mezbûr Mehmed’in zimmetini ibrâ ve ıskāt eylediğinde ol dahi medfû‘ı olan bedel-i sulh-ı mezkûr beş guruşa müte‘allika âmme-i de‘âvîden müdde‘î-i merkūmun zimmetini ibrâ ve ıskāt ve her biri âharın ibrâsını kabûl edip kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî-gurrei Ca sene 1206