Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 658 Hüküm no: 1056 Orijinal metin no: [86b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenciye Ayşe ile Memiş Çelebi’nin aralarındaki alacak verecek davasında sulh oldukları Ma‘rûz; Medîne-i Üsküdar’da Kefçe mahallesinde sâkine mu‘arrefetü’z-zât Âişe bt. Abdullah nâm Zenciye-i mu‘taka medîne-i mezbûrede mahfil-i bâbda meclis-i şer‘-i hatîrde Keresteci el-Hâc Memiş Çelebi b. el-Hâc Şaban tarafından vekîl olduğu es-Seyyid Mustafa b. Hasan ve Molla Salih b. İbrahim nâm kimesneler şehâdetleriyle sâbit olan müvekkil-i mezbûr sulbî kebîr oğlu es-Seyyid Abdullah mahzarında ben ücret ile hizmet eder makūlesinden olmamla târih-i i‘lâmdan yedi ay mukaddeme gelince müvekkil-i mezbûr el-Hâc Memiş Çelebi’ye menzilinde dört sene ücret kavlinsiz hizmet etmemle sinîn-i mezkûrede sebkat eden hizmetimin ecr-i mislini müvekkil-i mezbûr el-Hâc Memiş Çelebi’den taleb ederim deyü eylediği da‘vâsından bâ-tavassut-ı muslihîn yirmi guruş bedel-i makbûza vekîl-i mezbûr es-Seyyid Abdullah ile sulh olup husûs-ı mezkûra ve ziyâde ecr-i misline müte‘allika âmme-i de‘âvîden müvekkil-i mezbûr el-Hâc Memiş Çelebi’nin zimmetini ibrâ ve ıskāt eyledikde vekîl-i mezbûr dahi medfû‘u olan bedel-i merkūm yirmi guruşa müte‘allika âmme-i de‘âvîden müdde‘iye-i mezbûrenin zimmetini ibrâ ve ıskāt ve her biri ber-minvâl-i muharrer asâleten ve vekâleten âharın ibrâsını kabûl eyleyip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 2 min-Cumadelûlâ sene 1206