Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 659 Hüküm no: 1058 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eline bt. Yasef’in kolunu kırdığı iddiasıyla damadı aleyhine açtığı davadan bedeli karşılığında vazgeçtiği Ma‘rûz; Medîne-i Üsküdar’da Yenimahalle mütemekkinelerinden olup ber-vech-i âtî sol kolunun zirâ‘ ta‘bîr olunur kemiği meksûr idiği lede’l-keşf ve’l-mu‘âyene zâhir olan mu‘arrefetü’ş-şahs Eline bt. Yasef nâm Nasrâniye medîne-i mezbûrede mahfil-i bâbda meclis-i şer‘-i hatîrde hâlâ dâmâdı Taşcı Mihal v. Yorgi muvâcehesinde merkūm Mihal zimmî târih-i i‘lâmdan kırk gün mukaddem mahalle-i mezbûrede Sutaksîmi kurbünde menzili kapısı önünde vakt-i mağribde beni bi-gayrı hakkın ahz ve yere urup sol kolum taşa isâbet ve zirâ‘ kemiğimi kesr etmekle mûcib-i şer‘îsini taleb ederim deyü eylediği da‘vâsından bâ-tavassut-ı muslihîn yirmi guruş bedel mukābelesinde merkūm Mihal zimmî ile sulh olup zikr olunan zirâ‘ kemiğinin kesrine ve mâ yuhdesü minhe müte‘allika âmme-i de‘âvîden merkūm Mihal zimmînin zimmetini ba‘de’l-ibrâ ve’l-kabûl bedel-i sulh-ı merkūm yirmi guruşu dahi müdde‘iye-i mezbûreye edâ ve teslîme merkūm Mihal zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 4 min-Ca sene 1206