Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 660 Hüküm no: 1059 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe’nin Süleyman Beşe’ye olan borcunu ödemeye söz verdiği Ma‘rûz; Medîne-i Üsküdar’a muzâfe Kartal nâhiyesine tâbi‘ Başıbüyüklü karyesi sükkânından Süleyman Beşe b. Hüseyin medîne-i mezbûrede mahfil-i bâbda meclis-i şer‘-i hatîrde Osman Beşe b. Mustafa mahzarında işbu hâzır bi’l-meclis Hasan b. Abdi nâm kimesne zimmetinde bir çift kara sığır öküzü semeninden doksan beş guruş hakkıma mezbûr Osman Beşe târih-i i‘lâmdan on altı ay mukaddem tarafeynden bi’l-emr ve’l-kabûl kefîl ve dâmin olup meblağ-ı merkūm doksan beş guruşun otuz üç guruşunu mezbûr Hasan Beşe yedinden ahz ve bâkī altmış iki guruşunu dahi mezbûr Osman Beşe’nin kefâletine binâen taleb ederim deyü da‘vâ ve mezbûr Osman Beşe dahi ber-vech-i muharrer ikrâr ü i‘tirâf ve meblağ-ı merkūm altmış iki guruşun kırk guruşunu müdde‘î-i merkūm Süleyman Beşe’ye edâsıyla mezbûr Osman Beşe ba‘de’l-ilzâm, lâkin meblağ-ı bâkī-i merkūm yirmi iki guruşunu hâlen ve def‘aten edâya kudreti olmayıp tecîle tâlib olmağla müdde‘î-i mezbûr Süleyman Beşe dahi târih-i i‘lâmdan otuz gün tamamında edâ etmek üzere bi’r-rızâ mezbûr Osman Beşe’yi tecîl eylediğinde ol dahi ber-vech-i muharrer meblağ-ı bâkī-i merkūm yirmi iki guruşu ecel-i merkūm hulûlünde edâya ta‘ahhüd ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 4 min-Ca sene 1206