Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 660 Hüküm no: 1060 Orijinal metin no: [87a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeğen Ali Paşa’nın Üsküdar’da inşa ve vakfettiği Mevlevihane zaviyesinin vakfiye şartlarında değişiklik yaptığı Ma‘rûz; Sultânü’l-âşıkīn, burhânü’l-ârifîn Mevlana Celaleddin-i Rûmî -kuddise sırruhû- hazretlerinin tarîkat-i aliyyelerinden Medîne-i Üsküdar’da Mehmedpaşa mahallesinde sâkin sâhibü’l-hayrât ve’l-hasenât eş-Şeyh Numan Beyefendi ibnü’l-merhûm Yeğen Ali Paşa medîne-i mezbûrede meclis-i şer‘-i şerîf-i enverde bast-ı kelâm ve ta‘bîr ani’l-merâm edip işbu yedimde olan bin iki yüz beş senesi şehr-i Rebî‘ülevvelinin beşinci günü târihiyle müverraha bir kıt‘a vakfiye-i ma‘mûlün-bihâm mantûku üzere mahalle-i mezbûrede vâki‘ ihyâsına muvaffak olduğum Mevlîhâne zâviyesini vakf-ı sahîh ile vakf ve zâviye-i mezkûremin meşîhat ve tevliyetini Haremeyn-i Muhteremeyn müfettişi efendiler nezâretlerinde âsûde olmak üzere şart ve ta‘yîn etmiş idim lâkin vakf-ı mezkûrumun tebdîl ve tağyîri merreten ba‘de-uhrâ yedimde ve meşiyetimde ola deyü şart eylediğime binâen hâlâ meşîhat-i mezkûre nezâreti şurûtundan rücû‘ edip ancak tevliyet-i mezkûre kemâ-fi’s-sâbık Haremeyn-i Muhteremeyn müfettişi efendiler nezâretinde olup meşîhat-i mezkûre pîş-vâ-yı tarîkat ve reh-nümâ-yı hakīkat mevlana-yı mûmâ-ileyh hazretlerinin vilâyet-i Anadolu’da Konya kasabasında kâin âsitâne-i aliyyelerinde post-nişîn-i irşâd bulunan Şeyh Çelebi efendiler hazerâtının nezâretinde âsûde olup mukābelesinde yevmî altı akçe vazîfe olmak üzere beher sene on sekizer guruş seccâde bahâ irsâl ve îsâl oluna, meşîhat-i mezkûre münhal oldukda nâzır-ı vakf şeyh efendiler hazerâtının arzlarıyla tevcîh oluna, deyü şart ve ta‘yîn ve mâ‘adâ derûn-ı vakfiyede mastûr olan şurût-ı sâbıkām ile amel olunmak matlûbumdur dedikde vâkıf-ı mûmâ-ileyhin vakfiyesine nazar olundukda fi’l-hakīka vakf-ı mezkûrunun tebdîl ve tağyîri yedinde ve meşiyetinde olduğu musarrah olmağla tebdîl şurûtu tescîl-i şer‘î olunup vakfiye-i mezkûra kayd olunduğu aklâmda işbu tebdîl şurûtu dahi kaydı hâmişine şerh verilmek bâbında fermân-ı âlîleri sudûrunu istid‘â eylediği bi’l-iltimâs huzûr-ı âlîlerine i‘lâm olundu. Fî 6 min-Ca sene 1206