Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 661 Hüküm no: 1061 Orijinal metin no: [87a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın Abdurrahman Ağa’daki alacağının tahsili Ma‘rûz; Medîne-i Üsküdar’da Hasanağa mahallesinde sâkine ve zâtı mu‘arrefe sâhibe-i arzuhâl Hadice bt. Ali nâm bikr-i bâliğa meclis-i şer‘-i hatîrde arzuhâlde ismi mezkûr Abdurrahman Ağa b. Abdullah nâm kimesne mahzarında mezbûr Abdurrahman Ağa’nın talebiyle hâl-i sıgārımdan işbu târih-i i‘lâma gelince altı sene menzilinde iyâl ve evlâdına hizmet edip sinîn-i mezkûrede sebkat eden hizmetimin ecr-i misli ile mezbûr Abdurrahman Ağa yedinden istidâne ve kabz eylediği otuz guruş hakkımı taleb ederim deyü da‘vâ ve mezbûr Abdurrahman Ağa cevâbında müdde‘iye-i mezbûrenin ancak dört buçuk sene hizmetini ve meblağ-ı merkūm otuz guruş deyni olduğunu ikrâr ve ziyâde hizmetini inkârından mâ‘adâ müdde‘iye-i mezbûrenin hizmeti mukābelesinde beher şehr birer guruş ücret vermiş idim deyü beynlerinde ba‘de-vukū‘-ı’l-münâza‘a müdde‘iye-i mezbûre eylediği ecr-i misl da‘vâsından bâ-tavassut-ı muslihîn elli guruş bedel mukābelesinde mezbûr Abdurrahman Ağa ile sulh olup bedel-i sulh-ı merkūm elli guruş ile deyn-i merkūm otuz guruş ki cem‘an seksen guruşu merkūm Abdurrahman Ağa yedinden ahz ü kabz edip ziyâde ecr-i misline ve bi’l-cümle husûs-ı mezkûra müte‘allika âmme-i de‘âvîden mezbûr Abdurrahman Ağa’nın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 4 min-Ca sene 1206