Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 663 Hüküm no: 1065 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sırık hamalları tarafından arka hamallarına yapılan müdahalenin men edilmesi Ma‘rûz; Medîne-i Üsküdar’da Sırık hamalları Kethudâsı Mustafa b. Mehmed ve Ebûbekir b. Mehmed ve Hasan b. Osman nâm kimesne[ler] medîne-i mezbûrede mahfil-i bâbda meclis-i şer‘-i hatîrde Arka hamalları Kethudâsı es-Seyyid Ahmed Odabaşı b. Mustafa ve Hasan b. Hasan ve İbrahim b. Mustafa ve Hüseyin b. Ali ve Osman b. Mustafa ve Mehmed b. Hasan ve diğer Mehmed b. Hüseyin nâm kimesneler mahzarlarında dakīk çuvalı ve at lâşesi ve bir kaban? ve bal fıçısı nakli ez-kadîm bizim hamûlemizden iken biraz müddetden beri arka hamalları merkūmûn bize mahsûs olan hamûleye müdâhale ve nizâm-ı kadîmimizin ihtilâline bâdî olurlar deyü muvâcehelerinde teşekkî eylediklerinde arka hamalları cevâblarında bir kapan? ve bal fıçısı, iki kantar ve dahi noksân olan hamûlenin nakli bize mahsûs olup hattâ bin yüz otuz dört senesi kezâlik hamallar beynlerinde vukū‘ bulan nizâ‘larında serkaban? ve bal fıçısı, iki kantar ve dahi noksân olan hamûlenin nakli arka hamallarına mahsûs ve târih-i merkūmda bu vechile tanzîm ve taht-ı zâbıtaya ifrâğ ve ber-vech-i muharrer nizâmı muhtevî hüccet tahrîr olunmuş iken merkūmûn nizâm-ı kadîme ri‘âyet etmeyip ihtilâl-i nizâmımıza bâdî olurlar deyü münâza‘a ve fi’l-hakīka arka hamalları merkūmûnun takrîrleri üzere bir kapan ve bal fıçısı ve iki kantar ve dahi noksân olan hamûlenin nakli arka hamallarına mahsûs olduğu târih-i merkūm ile müverraha ibrâz eyledikleri hüccet-i nizâmda muharrer olduğundan mâ‘adâ nizâm-ı kadîmleri dahi bu vechile olduğunu sırık hamalları merkūmûn ikrâr ü i‘tirâf etmeleriyle mûcebiyle bir kapan ve bal fıçısı, iki kantar ve dahi noksân olan hamûlenin nakl-i kadîmî üzere arka hamallarına mahsûs olup hilâf-ı nizâm-ı kadîm arka hamalları merkūmûna müdâhale eylememek üzere sırık hamalları merkūmûndan her birine tenbîh olunduğu bi’l-iltimâs huzûr-ı âlîlerine i‘lâm olundu. Fî 12 min-Ca sene 1206