Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 663 Hüküm no: 1066 Orijinal metin no: [87b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miyane bt. Artin’in Bedros’a verdiği parayı geri almasının mümkün olmadığı Ma‘rûz; Medîne-i Üsküdar’da Yenimahalle’de mütemekkine ve şahsı mu‘arrefe arzuhâl eden Miyan bt. Artin nâm Nasrâniye medîne-i mezbûrede meclis-i şer‘-i hatîrde mahalle-i mezbûrede [mezbûre] avârızı vakfının mütevellîsi arzuhâlde ismi mezkûr Agasi v. Artin muvâcehesinde vakf-ı mezbûr musakkafâtından mahalle-i mezbûrede vâki‘ ma‘lûmü’l-hudûd bir bâb vakıf menzilimi târih-i i‘lâmdan otuz sene mukaddem bâ-ma‘rifet-i mütevellî Bedros nâm zimmîye ferâgat edip ba‘dehû merkūm Bedros hâlik oldukda üç nefer evlâdına intikāl eyledikde evlâdından dahi Dudu nâm Nasrâniye bilâ-veled hâlike olup menzil-i mezkûrdan sülüs hisse-i şâyi‘ası mahlûl olmağla mütevellî-i merkūm Agasi zimmî târih-i i‘lâmdan üç sene mukaddem menzil-i mezkûrdan mahlûl olan sülüs hisse-i mezkûreyi yüz elli guruş mu‘accel ile bi’t-tevliye bana îcâr ve mu‘accel-i merkūm yüz elli guruşu yedimden ahz ü kabz etmiş idi lâkin ben menzil-i mezkûru hâlik-i merkūm Bedros zimmîye ferâgat eylediğimde bedel-i ferâğ nâmıyla bana bir akçe vermeyip bilâ-bedel ferâgat eylediğime binâen menzil-i mezkûrun tasarrufu benim olmuş olmağla mütevellî-i merkūma mu‘accel nâmıyla medfû‘um olan meblağ-ı merkūm yüz elli guruşu istirdâd ederim deyü müdde‘iye-i merkūme Miyan Nasrâniye’nin takrîri üzere tasaddî eylediği da‘vâsı meşrû‘a olmadığı ba‘de’t-tescîl bi’l-iltimâs huzûr-ı âlîlerine i‘lâm olundu. Fî 11 min-Ca sene 1206