Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 665 Hüküm no: 1070 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in binasının Fatma Hanım’ın evine verdiği zararın önlenmesi Ma‘rûz; Sâdır olan fermân-ı âlîlerine imtisâlen kıbel-i şer‘-i şerîfden meb‘ûs Mustafa Efendi dâ‘îleri ve Hâssa mi‘mârı hulefâsından Mehmed b. Abdullah ve Mustafa b. Ali Halîfe ile medîne-i Üsküdar’da Selmanağa mahallesinde vâki‘ sâhibe-i arzuhâl Fatıma bt. Abdullah nâm hatunun menziline varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde mezbûre Fatıma Hatun tarafından ber-vech-i âtî vekîl-i müseccel-i şer‘îsi Bostanî Abdüllatif b. İsmail nâm kimesne meclis-i ma‘kūd-ı mezkûrda arzuhâlde ismi mezkûr Mustafa b. Mehmed mahzarında mezbûr Mustafa müvekkilem mezbûrenin menzili karşısında [tarîk-i] âm üzerine bu esnâda müceddeden binâ eylediği menzilinin fevkānî iki oda ve bir sofasının yedi aded pencerelerinden müvekkilem mezbûrenin menzilinde makarr-ı nisvân olan kuyu başı ve matbahı görünüp havâle-i zararı olmağla men‘ u def‘ olunmak bi’l-vekâle matlûbumdur deyü da‘vâ ve mi‘mârân-ı mezbûrân ile sâir bî-garaz ehl-i vukūf nazar eylediklerinde fi’l-hakīka mezbûr Mustafa’nın müceddeden binâ eylediği menzilinin fevkānî iki oda ve bir sofasının yedi aded pencerelerinden müvekkile-i mezbûre Fatıma Hatun’un menzilinin makarr-ı nisvân olan kuyu başı ve matbahına nezâreti olup havâle-i zararı olduğu lede’l-mu‘âyene zâhir oldukdan sonra beynlerine muslihûn tavassut edip mezbûr Mustafa müvekkile-i mezbûrenin menzili duvarı üzerine tûlen on dört ve arzen buçuk zirâ‘ muhkem dolma duvarı binâsıyla zikr olunan havâle-i zararını def‘a ta‘ahhüd eyledikde vekîl-i mezbûr dahi râzı olup bu vechile kat‘-ı münâza‘a eyledikleri ba‘de’t-tescîl ve’l-inhâ mübâşiri kapıkethudâsı kulları iltimâsıyla huzûr-ı âlîlerine i‘lâm olundu. Fî 13 min-Ca sene 1206