Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 666 Hüküm no: 1071 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf menzilin tasarrufunda meydana gelen ihtilafın giderilmesi Ma‘rûz; Sâdır olan fermân-ı âlîlerine imtisâlen kıbel-i şer‘-i şerîfden meb‘ûs Mehmed Esad Efendi dâ‘îleri Mahmiye-i İslâmbol hısnı ebvâbından Kumkapı dâhilinde Nişâncı Mehmed Paşa-yı atik mahallesinde vâki‘ zikri âtî münâza‘u’n-fîh menzile varıp hâssa mi‘mârı tarafından Mehmed Halîfe ve sâir mazbûtü’l-esâmî bî-garaz Müslimîn huzûrlarında akd-i meclis-i şer‘-i âlî eyledikde sâhib-i arzuhâl Ömer Ağa b. Hasan nâm kimesne kendi nefsinden asıl ve zevcesi Hadice bt. el-Hâc Osman nâm hatun tarafından ber-vech-i âtî vekîl olduğu mahalle-i mezbûre imâmı Süleyman Efendi b. Ali ve Ali Beşe b. Ömer nâm kimesneler şehâdetleriyle sâbit olmağla vekâleten meclis-i ma‘kūd-ı mezkûrda câr-ı mülâsıkı Menar İbrahim b. Abdurrahman mahzarında nezâret-i dâ‘îlerinde âsûde olan evkāfdan medîne-i Üsküdar’da Gülfam Hatun mahallesi câmi‘-i şerîfinde merhûm Kâtib Musa Efendi Vakfı musakkafâtından olup sâlifü’z-zikr Nişâncıbaşı mahallesinde vâki‘ arslancı odaları derûnunda kâin işbu derûnunda akd-i meclis-i şer‘ olunan ma‘lûmü’l-hudûd ve’l-müştemilât bir bâb vakıf menzil ber-mûceb-i temessük bi’l-icâreteyn zevcân-ı mezbûrân tasarruflarında olup kezâlik menzil-i mezkûr ittisâlinde vâki‘ yine vakf-ı mezbûr musakkafâtından mezbûr İbrahim’in tasarrufunda olan menzilin ulvîsinde tahte’s-semâsının ittisâlinde tahta perde ile mümtâz ve mu‘ayyen tahte’s-semâ bizim tasarrufumuzda iken fuzûlî tahta perdesini hedm ve bi-gayrı hakkın müdâhale eder deyü vakf-ı mezbûr mütevellîsi tarafından Câbî Molla Hüseyin hâzır olduğu hâlde da‘vâ ve mezbûr İbrahim cevâbında müdde‘î-i mezbûr Ömer Ağa’nın iddi‘â eylediği tahte’s-semâ, menzilim ulvîsinde olmağla binâen-aleyh benim tasarrufumda olmuş olur deyü kadîmden müdde‘î-i mezbûr Ömer Ağa’nın menzili tarafından zabt ü tasarruf olunageldiğini inkâr etmekle müdde‘î-i mezbûr Ömer Ağa mezbûr İbrahim’in menzili ulvîsinde tahte’s-semâsının ittisâlinde tahta perde ile mümtâz ve mu‘ayyen tahte’s-semâ ber-mûceb-i temessük tasarrufunda olup kadîmden müdde‘î-i mezbûr Ömer Ağa menzili tarafından zabt ü tasarruf olunageldiğini udûlden el-Hâc Feyzullah b. el-Hâc Mehmed ve es-Seyyid el-Hâc Musa Ağa b. İsmail nâm kimesneler şehâdetleriyle vech-i şer‘î üzere mezbûr İbrahim muvâcehesinde isbât etmeğin mûcebiyle zikr olunan tahte’s-semâ kadîmisi üzere müdde‘î-i mezbûr Ömer Ağa menzili tarafından zabt ü tasarruf olunup bî-vech-i şer‘î müdâhale ve mu‘ârazadan [men‘ olunmak] üzere mezbûr İbrahim’e şer‘an tenbîh eylediğini mezbûr dâ‘îleri mahâllinde ba‘de’t-tahrîr ve’l-inhâ medîne-i Üsküdar mahkemesinden bi’l-iltimâs huzûr-ı âlîlerine i‘lâm olundu. Fî 11 min-Ca sene 1206