Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 668 Hüküm no: 1075 Orijinal metin no: [88a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın borcunu ödemesi Ma‘rûz; Medîne-i Üsküdar’da Hamzafakih mahallesinde sâkine mu‘arrefetü’z-zât Hadice bt. Mustafa medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe Âişe bt. Abdullah nâm hatun mahzarında târih-i i‘lâmdan sekiz ay mukaddem mezbûre Âişe Hatun yedimden istidâne ve kabz ve umûruna sarfla istihlâk eylediği sekiz guruş ve yine yedimden iştirâ ve kabz eylediği bir penbe zâr gömlek semeninden on yedi guruş ve iki munakkaş çevre ve bir don semeninden on buçuk guruş ki cem‘an otuz beş buçuk guruş zimmetinde hakkım olmağla taleb ederim deyü da‘vâ ve mezbûre Âişe Hatun cevâbında ancak zikr olunan gömlek semeninden on yedi guruş deyni olduğunu ikrâr ziyâde ciheteyn-i mezkûreteynden on sekiz buçuk guruş deyni olduğunu inkâr etmeğin mûcebiyle müdde‘iye-i mezbûre ber-vech-i muharrer ziyâde müdde‘âsını isbâta kādire olamayıp talebiyle mezbûre Âişe Hatun gıbbe’t-tahlîfi’ş-şer‘î müdde‘iye-i mezbûre ziyâde müdde‘âsıyla mezbûre Âişe Hatun’a bilâ-beyyine mu‘ârazadan ba‘de’l-men‘ mezbûre Âişe Hatun mukırra olduğu meblağ-ı merkūm on yedi guruşun müdde‘iye-i mezbûreye edâsıyla şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 15 min-Ca sene 1206