Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 669 Hüküm no: 1076 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf menzilin kullanımında ortaya çıkan ihtilafın giderilmesi Ma‘rûz; Mahmiye-i İslâmbol’da Karagümrük kurbünde sâkine sâhibe-i arzuhâl mu‘arrefetü’z-zât Sadriye, nâm-ı diğer Halime bt. Mehmed Sadık medîne-i Üsküdar’da meclis-i şer‘-i hatîrde arzuhâlde ismi mezkûre Hadice bt. Abdullah tarafından vekîl olduğu zât-ı mezbûreyi bi’l-ma‘rifeti’ş-şer‘iye ârifân Süleyman Ağa b. Ömer ve el-Hâc Ahmed b. Hüseyin nâm kimesneler şehâdetleriyle sâbit olan müvekkile-i mezbûrenin dâmâdı es-Seyyid İbrahim b. es-Seyyid Halil mahzarında medîne-i mezbûrede Ahmed Çelebi mahallesinde vâki‘ ma‘lûmü’l-hudûd ve’l-müştemilât bir bâb vakıf menzil babam mezbûr Mehmed Sadık’ın taht-ı tasarrufunda iken babam mezbûr Mehmed Sadık vefât edip menzil-i mezkûr intikāl-i âdî ile bana intikāl edip lâkin ben diyâr-ı âharda olmamla mezbûr Hadice Hatun menzil-i mezkûru bi-gayrı hakkın tegallüben zabt ü tasarruf etmekle menzil-i mezkûrdan kasr-ı yed ve bana teslîme müvekkilesine izâfetle vekîl-i mezbûra tenbîh olunmak matlûbumdur deyü da‘vâ ve vekîl-i mezbûr cevâbında hâlâ menzil-i mezkûr ber-mûceb-i temessük gāib ani’l-meclis kuzâtdan Hüseyin Efendi nâm kimesnenin icâreteyn ile taht-ı tasarrufunda olup müvekkilem mezbûre ücret-i ma‘lûme ile müstecireten sâkinedir deyü müvekkilesi üzerinden husûmeti def‘ eyledikde müdde‘iye-i mezbûre gāib-i mezbûr Hüseyin Efendi ile terâfu‘ iktizâ eylediği mübâşiri çavuş kulları iltimâsıyla huzûr-ı âlîlerine i‘lâm olundu. Fî 24 min-Ca sene 1206