Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 669 Hüküm no: 1077 Orijinal metin no: [88b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa b. Halil’in terekesinin vârislerine taksimiyle ortaya çıkan alacak davasının halledilmesi Ma‘rûz; Medîne-i Üsküdar’da Turbali mahallesinde sâkin iken bundan akdem vefât eden Ömer Ağa b. Halil nâm kimesnenin verâseti vâlidesi Fatıma bt. Mehmed nâm hatun ile li-ebeveyn er karındaşı İbrahim Çelebi’ye münhasıra ve terekesinin üç sehm i‘tibârıyla bir sehmi anası mezbûre Fatıma’ya ve iki sehmi karındaşı mezbûr İbrahim Çelebi’ye isâbeti tahakkukundan sonra ah-i mezbûr İbrahim Çelebi medîne-i mezbûrede meclis-i şer‘-i hatîrde diğer İbrahim b. Şaban nâm kimesne mahzarında mezbûr diğer İbrahim işbu yedimde olan bin iki yüz bir senesi Cumâdelulâ’sının sekizinci günü târihiyle müverrah bir kıt‘a temessük mantûkunca karındaşım müteveffâ-yı mezbûr Ömer Ağa yedimden iktirâz ve kabz ve umûruna sarfla istihlâk eylediği iki yüz seksen guruş hakkımın doksan guruşunu hayatında ahz ü istifâ ve yüz doksan guruşunu kable’l-ahz vefât edip bize mevrûs olmağla meblağ-ı merkūmdan ber-tashîh-i merkūm bana isâbet eden hisse-i irsiyemi taleb ederim deyü da‘vâ ve mezbûr diğer İbrahim cevâbında fi’l-hakīka ber-mantûk-ı temessük müteveffâ-yı mezbûra ol-mikdâr deyni olduğunu ikrâr lâkin kabzını mu‘terif olduğu doksan guruşdan mâ‘adâ altmış guruşunu zevcem Fatıma Hatun yediyle ve yüz guruşunu şerîkim yediyle müteveffâ-yı mezbûra edâ ve teslîm ve bâkī otuz guruşdan benim zimmetimi ibrâ ve ıskāt edip hatta yed ve zimmetimde aslâ hakkı bâkī kalmadığını huzûr-ı Müslimînde ikrâr ve işhâd etmiş idi deyü ba‘de’d-def‘ ve’l-inkâr dâfi‘-i mezbûr diğer İbrahim def‘-i mezkûrunu udûlden Yusuf b. el-Hâc Mustafa ve el-Hâc İbrahim b. el-Hâc Osman nâm kimesneler şehâdetleriyle vech-i şer‘î üzere isbât etmeğin mûcebiyle müdde‘î-i mezbûr İbrahim da‘vâ-yı mezkûresiyle mezbûr diğer İbrahim’e bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 7 min-Ca sene 1206