Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 670 Hüküm no: 1078 Orijinal metin no: [88b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın satışını yaptığı ev ve tarla hisselerini geri alma talebine itibar edilmediği Ma‘rûz; Medîne-i Üsküdar’da Vâlide-i Atik mahallesinde sâkine mu‘arrefetü’z-zât Hadice bt. Ahmed nâm hatun medîne-i mezbûrede mahfil-i bâbda meclis-i şer‘-i hatîrde Mehmed Ali ve Ahmed ibney İbrahim nâm kimesne [karındaşlar] mahzarlarında medîne-i mezbûreye muzâfe Yoros nâhiyesine tâbi‘ Kurddoğmuş karyesinde vâki‘ ma‘lûmü’l-hudûd bir bâb mülk menzil ile yine karye-i mezbûrede kâin bir kıt‘a tarlanın nısfları benim ve nısf-ı âharı zevcim işbu hâzır bi’l-meclis Ahmed b. Mehmed’in olup bin iki yüz üç senesi Şa‘bân’ının yedinci günü menzil-i mezkûru mezbûrân Mehmed Ali ve Ahmed ile âhar karındaşları olup gāib ani’l-meclis Selim nâm kimesneye ale’l-iştirâki’s-seviyy iki yüz otuz guruş semen-i makbûza zevcim mezbûr Ahmed ile mâ‘an bey‘ u temlik ve zikr olunan tarlayı dahi mezbûrûna kezâlik ale’l-iştirâki’s-seviyy bâ-ma‘rifet-i sâhib-i arz meccânen tefvîz eylediğimizde onlar dahi ber-vech-i muharrer iştirâ ve temellük ve tefevvüz ve kabûl edip hattâ bey‘ u tefvîzimizi müş‘ir kıbel-i şer‘den bir kıt‘a hüccet-i şer‘iye dahi i‘tâ olunmuş idi lâkin bey‘-i mezkûr[a] nâdime olmamla meblağ-ı makbûz-ı merkūm iki yüz otuz guruşdan hisseme isâbet eden yüz on beş guruşu yedimden ahz ve menzil-i mezkûrda olan nısf hissem ile tarla-yı mezkûrun nısfını bana redd ü teslîme mezbûrân Mehmed Ali ve Ahmed’den her birine tenbîh olunmak matlûbumdur deyü müdde‘iye-i mezbûre Hadice Hatun’un ber-vech-i muharrer takrîri üzere tasaddî eylediği da‘vâ-yı gayr-ı meşrû‘asına iltifât olunmadığı bi’l-iltimâs huzûr-ı âlîlerine i‘lâm olundu. Fî 11 min-Ca sene 1206