Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 671 Hüküm no: 1080 Orijinal metin no: [88b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hüseyin b. Osman’ın borcunu ödemesi Ma‘rûz; Medîne-i Üsküdar’da Davudpaşa mahallesinde sâkin İbrahim Beşe b. Ali mahfil-i bâbda meclis-i şer‘-i hatîrde Molla Hüseyin b. Osman mahzarında târih-i i‘lâmdan üç sene mukaddem ben işbu hâzırân bi’l-meclis el-Hâc Ali b. Hasan ve el-Hâc Hasan b. Ahmed nâm kimesneler ile dakīk-i hâs bey‘ u şirâsında islâsen şerîk olmamla mâl-ı şirketden olmak üzere yedimden iştirâ ve kabz eylediği beher vakıyyesi on dörder paradan yüz yetmiş sekiz buçuk vakıyye dakīk-i hâs semeninden altmış iki buçuk guruş zimmetinde hakkımız olmağla taleb ederim deyü da‘vâ ve mezbûr Molla Hüseyin cevâbında ber-vech-i muharrer ancak yüz üç vakıyye dakīk-i hâs iştirâ edip müdde‘î-i mezbûr ile mezbûrân el-Hâc Ali ve el-Hâc Hasan’a otuz altı guruş iki para deyni olduğunu ikrâr ve deyn-i meblağ-ı merkūm otuz altı guruş iki parayı dahi tamamen mezbûr İbrahim Beşe’ye edâ edip zimmetim berî olmuşdur deyü ba‘de’d-def‘ ve’l-inkâr müdde‘î-i mezbûr ziyâde müdde‘âsını beyâna ba‘de’l-havâle dâfi‘-i mezbûr Molla Hüseyin dahi eylediği def‘ini isbâta kādir olamayıp talebiyle müdde‘î-i mezbûr İbrahim Beşe gıbbe’t-tahlîfi’ş-şer‘î mûcebiyle meblağ merkūm otuz altı guruş iki parayı müdde‘î-i mezbûra edâya mezbûr Molla Hüseyin’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 14 min-Ca sene 1206