Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 672 Hüküm no: 1083 Orijinal metin no: [89a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşradan gelen hayvanların kesim ve dağıtımında sığır kasaplarının işlerine karışanların men edilmesi Ma‘rûz; Medîne-i Üsküdar’da sığır kasabı olan Bekir b. İbrahim nâm kimesne meclis-i şer‘-i hatîrde medîne-i mezbûreye tâbi‘ Bulgurlu karyesi sükkânından Halil b. İbrahim nâm kimesne ile medîne-i mezbûrede Yenimahalle’de mütemekkin Mardıros v. Pela nâm zimmî muvâcehesinde medîne-i mezbûrede ve mahmiye-i İslâmbol’da bi’l-cümle sığır kasablarının nizâm-ı kadîmleri taşradan gelen öküz ve inek ve camus Yedikule selhhânesinde kethudâ ve yiğitbaşı ve sâir ustalar ma‘rifetleriyle tevzî‘ ve taksîm olunup her birimiz kabz eylediğimiz hissemizi selhhânelerimizde zebh ve iç yağını mumculara ve cildini cebehâne ve Tersâne-i âmire umûr-ı lâzımesi’çün debbâğlara ve lahmını ibâdullâha narh-ı rûzî üzere bey‘ ede gelip lâkin hâricden ba‘zı kimesneler zikr olunan hayvanâtı mugāyir-i nizâm-ı kadîm ashâbından ziyâde bahâ ile iştirâ ve zebh ve mahallât aralarında hufyeten bey‘ ve iç yağı ve cildleri ve itlâf ve ibâdullâhın muzâyakalarına bâdî olmalarıyla siyâneten li’l-ibâd ve bu misillü hâricden olan kimesneler hayvanât-ı mezkûrenin zebh ve bey‘inden men‘ ve memnû‘ olmayanlar şer‘le tedît [tedîb] olunmak bâbında işbu yedimde olan bin iki yüz iki senesi evâhir-i şehr-i Rebî‘ülâhiri târihiyle müverrah ve tuğrâ-yı garrâ ile müveşşah bir kıt‘a fermân-ı âlî sâdır olmuş iken merkūmân ve Mardıros hilâf-ı fermân-ı âlî hayvanât-ı mezkûreyi zebh ve bey‘ ve itlâf etmeleriyle men‘ u def‘ olunmak matlûbumdur deyü bi’l-cümle takrîr-i meşrûhuna mutâbık bir kıt‘a fermân-ı âlî ibrâzıyla teşekkî eyledikde onlar dahi ber-vech-i muharrer hayvanât-ı mezkûreyi ashâbından iştirâ ve zebh ve bey‘ eylediklerini ikrâr ve husûs-ı mezkûr bâ-hatt-ı hümâyûn-ı şevket-makrûn ref‘ olunan inhisâr-ı bey‘a münâfî olmayıp bu misillü ibâdullâhın muzâyakalarına bâdî erzâk makūlesinin inhisârı müstesnâ olduğu fermân-ı âlî-şânda tasrîh olunduğundan mâ‘adâ merkūmân fî-mâ ba‘d hilâf-ı fermân-ı âlî hayvanât-ı mezkûreyi zebh ve bey‘ ve itlâf etmemek üzere her biri ta‘ahhüd eylediklerinde mezbûr-ı diğer dahi ta‘ahhüdlerini kabûl ve bu vechile beynleri ıslâh olunduğu Üsküdar Mahkemesi’nde tescîl ve bi’l-iltimâs huzûr-ı âlîlerine i‘lâm olundu. Fî 16 min-Ca sene 1206