Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 673 Hüküm no: 1084 Orijinal metin no: [89a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasapların elde ettikleri iç yağlarını mumcu esnafından başkalarına satmasına mani olunması Ma‘rûz; Medîne-i Üsküdar’da mumcu esnâfından Hasan Ağa b. Cafer ve Mustafa Beşe b. Abdullah nâm kimesneler meclis-i şer‘-i hatîrde yine medîne-i mezbûre kasab esnâfının yiğitbaşıları Mehmed b. Abdullah nâm kimesne mahzarında ez-kadîm beynimizde mer‘î ve mu‘teber olan nizâm-ı kadîmimiz kasab esnâfı dükkânlarında zebh eyledikleri lahmını dükkânlarında ibâdullâha bey‘ ve iç yağını dahi narh-ı rûzî üzere bize bey‘ biz dahi mum i‘mâl edip ibâdullâha bey‘ edip mum tedârikinde ibâdullâhın zarûretleri def‘ olunur iken bu esnâda kasab esnâfı tama‘-ı hâmma teba‘iyet birle hâsıl olan iç yağını ziyâde bahâ ile hârice bey‘ ve itlâf ve ibâdullâhın zarûretlerine bâdî olmalarıyla suâl olunup nizâm-ı kadîmimiz üzere dükkânlarında hâsıl olan iç yağını âhara bey‘le itlâf olunmayıp narh-ı rûzî üzere bize bey‘ eylemek üzere tenbîh olunmak matlûbumuzdur deyü teşekkî eylediklerinde ol dahi cevâbında fi’l-hakīka nizâm-ı kadîmleri vech-i muharrer olduğunu mukırr u mu‘terif ve fî-mâ ba‘d kasab esnâfı dükkânlarında hâsıl olan iç yağını âhara bey‘le itlâf etmeyip mumcu esnâfına bey‘ etmek üzere kasab ustalarının her birine ferden ferden tenbîh ve tekîd ve ta‘ahhüd ve mugāyir-i nizâm hareket ederi olur ise tedîb ve gûş-mâl olunmak üzere beynleri ıslâh olunduğu Üsküdar Mahkemesi’nde tescîl ve bi’l-iltimâs huzûr-ı âlîlerine i‘lâm olundu. Fî 16 min-Ca sene 1205