Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 674 Hüküm no: 1085 Orijinal metin no: [89a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tokatlı Ali Beşe ile ortağı Kazeros’un aralarındaki alacak verecek davasında sulh oldukları Ma‘rûz; Medîne-i Üsküdar muzâfâtından Beykoz kasabasına tâbi‘ Dereseki karyesinde sâkin sâhib-i arzuhâl Tokatlı Ali Beşe b. Mehmed nâm kimesne meclis-i şer‘-i hatîrde arzuhâlde mezkûr Kazeros v. Asvader nâm zimmî muvâcehesinde târih-i i‘lâmdan bir sene mukaddem merkūm Kazeros zimmî ile hatab bey‘ u şirâsında akd-i şirket ve hatabcılara vermek içün yedine teslim eylediğim yüz seksen guruşu ashâbına teslim etmeyip yedinde kalmağla taleb ederim deyü da‘vâ ve merkūm Kazeros zimmî cevâbında ber-vech-i muharrer şerîk olduklarını ikrâr lâkin bundan akdem kasaba-i mezbûre mahkemesinde mürâfa‘a ve benim sermâyem olan doksan beş guruşu mezbûr Ali Beşe’den taleb ve hîn-i hesâbımızda otuz beş guruş benim makbûzum olup bâkī altmış guruş mezbûr Ali Beşe zimmetinde zuhûr eyledikde meblağ-ı merkūm altmış guruşun yirmi dokuz guruş on iki parasını ma‘lûmü’l-esâmî kimesnelere havâle ve bâkī otuz guruş yirmi sekiz parayı dahi bana edâya ta‘ahhüd ve hâlâ meblağ-ı merkūmu kabz etmemle mezbûr Ali Beşe bi’l-cümle husûs-ı şirkete müte‘allika âmme-i de‘âvîden her birimiz âharın zimmetini ba‘de’l-ibrâ ve’l-kabûl kat‘-ı münâza‘a etmişidik deyü takrîrine mutâbık bir kıt‘a i‘lâm ibrâz eyledikde mezbûr Ali Beşe mazmûn-ı i‘lâmı ikrâr ü i‘tirâf etmeğin mûcebiyle husûs-ı merkūmda merkūm Kazeros zimmîye bî-vech-i şer‘î mu‘ârazadan men‘ olunduğu medîne-i mezbûre bâb mahkemesinden huzûr-ı âlîlerine i‘lâm olundu. Fî-gurrei C sene 1206