Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 675 Hüküm no: 1088 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzguncuk Köyü Subaşısı Ahmed’in fuhuş yapıldığı yolundaki iddialarını ispatlayamadığı Ma‘rûz; Medîne-i Üsküdar’a tâbi‘ Kuzguncuk karyesi mütemekkinlerinden arzuhâl eden Francalacı Yorgi v. Nikola ve menzilinde müsteciri Sarrâf Yamandi v. Nikola nâm zimmîler medîne-i mezbûrede meclis-i şer‘-i hatîrde karye-i mezbûre subaşısı Ahmed b. Hüseyin mahzarında mezkûr Ahmed târih-i i‘lâmdan iki gece mukaddem sâ‘at dörtde altı nefer hizmetkârıyla mazanna-i töhmetdir deyü merkūm Yorgi zimmînin menzili[ni] basıp şutûm-ı galîza ile şetm ve darb ile ahz ü habs esnâsında merkūm Yamandi zimmînin nakden yirmi yedi buçuk guruş ve kesesi derûnunda iki yüz on iki guruş kıymetli otuz üç yaldız altunu ve yirmi zer-i mahbûb nısfiyesi ve on iki aded rub‘iye altun ile altmış guruş kıymetli bir aded pandol sâ‘atimi bi-gayrı hakkın ahz eyledi deyü her biri şetm ve darbı ve eşyâ-i mezkûreyi da‘vâ eylediklerinde mezbûr Ahmed cevâbında merkūmân Yorgi ve Yamandi fevâhiş makūlesinden dört nefer avratlar icrâ-yı fısk içün cem‘ oldukları hâlde ahz ve yirmi yedi guruş ahz eylediğini ikrâr lâkin müdde‘iyân-ı merkūmânın mâ‘adâ mutâlebelerini inkâr etmekle karye-i mezbûre re‘âyâsından işbu hâzırûn bi’l-meclis Mosi v. İsak ve Hayim v. İsrael ve Yuda v. Mosi ve İsak v. Mail ve Şamuyel v. Avram ve Nesim v. Levi nâm Yahûdîler ile Rûmiyân tâifesinden Papa Makari v. Yorgi ve diğer Papa Makari v. Petro ve Papa Todori v. İzlado ve Papa Mihal v. Hıristo ve Dimitri v. Todori ve Dimitri v. Todori? ve Petro v. Dimitri ve Pandeli v. Kostanti ve Nikola v. Foti ve Kâhya Mihal v. Dimitri nâm zimmîlerden istisvâb ve istikşâf-ı hâl içün istintâk olunduklarında gerek subaşı-ı mezbûr Ahmed’in ve gerek müdde‘iyân-ı merkūmânın hilâf-ı şer‘ vaz‘ u hareketleri ma‘lûmumuz değildir deyü hüsn-i hâllerini muvâcehelerinde ba‘de’l-ihbâr beynlerine muslihûn tavassut edip subaşı-ı mezbûr Ahmed kat‘a li’n-nizâ‘ makbûzu olan meblağ-ı merkūm yirmi yedi guruşu merkūm Yamandi zimmîye redd ü teslîm eyledikde onlar dahi mâ‘adâ müdde‘âları olan eşyâ-i mezkûreye ve kıymetlerine ve darb ve şetme müte‘allika âmme-i de‘âvîden merkūm Ahmed’in zimmetini ibrâ ve ıskāt eylediklerinde ol dahi ber-vech-i muharrer ibrâlarını kabûl edip kat‘-ı münâza‘a eyledikleri tescîl ve mübâşiri Paşalı Ali Çavuş kulları iltimâsıyla huzûr-ı âlîlerine i‘lâm olundu. Fî-gurrei C sene 1206