Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 676 Hüküm no: 1089 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Bekir’in elinde bulunan eniştesine ait borç temessükünü Limya v. Kostandi’ye teslim ettiği Ma‘rûz; Mahrûse-i Galat mütemekkinlerinden Milya v. Kostanti nâm zimmî medîne-i Üsküdar’da mahfil-i bâbda meclis-i şer‘-i hatîrde es-Seyyid Bekir b. es-Seyyid Eyüb nâm kimesne mahzarında mezbûr es-Seyyid Bekir’in eniştesi gāib ani’l-beled Kalyoncu Emin Çavuş zimmetinde semen-i bey‘den yüz on beş guruş alacak hakkım olup meblağ-ı merkūm yüz on beş guruş bana deyni olmak üzere bir temessük tahrîr ve hizmetkârı hâzır bi’l-meclis Mihal zimmî yediyle bana irsâl edip lâkin mezbûr es-Seyyid Bekir zikr olunan temessüğü bir takrîb merkūm Mikâil zimmîden ahz edip yedinde olmağla suâl olunup bana teslîme tenbîh olunmak matlûbumdur deyü da‘vâ ve mezbûr es-Seyyid Bekir cevâbında fi’l-hakīka müdde‘î-i merkūmun takrîri üzere gāib-i mezbûr Kalyoncu Emin Çavuş’un müdde‘î-i mezbûra yüz on beş guruş deynini nâtık bir kıt‘a temessüğünü merkūm Mihal zimmî yedinden ahz edip hâlâ yedinde olduğunu ikrâr ve mûcebiyle zikr olunan temessüğü müdde‘î-i merkūma teslîme mezbûr es-Seyyid Bekir’e tenbîh olundukda ol dahi zikr olunan temessüğü müdde‘î-i merkūma meclisde teslîm edip ol dahi ahz ü kabz edip kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 16 min-C sene 1206