Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 680 Hüküm no: 1099 Orijinal metin no: [90a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saide Hanım’ın vakıf menzilin tasarrufunun kendinde olmasının gerektiği yolundaki iddiasının araştırılması Ma‘rûz; Mahmiye-i İslâmbol’da Karagümrük kurbünde sâkin derûn-ı arzuhâlde mezkûretü’l-ism mu‘arrefetü’z-zât Saide bt. Mehmed Sadık nâm hatun medîne-i Üsküdar’da mahfil-i bâbda meclis-i şer‘-i hatîrde zikri âtî vakıf menzile mutasarrıf sâhib-i arzuhâl Hüseyin Efendi b. Mehmed mahzarında medîne-i mezbûrede Ahmed Çelebi mahallesinde vâki‘ Fıstıklı sokağında vâki‘ bir bâb vakıf menzili bundan akdem ecdâdımızdan Mustafa Dede b. Abdullah vakfedip süknâsını evlâd ve evlâdına ba‘de’l-inkırâz mahalle-i mezbûre imâmına şart ve ta‘yîn olunmuş iken târih-i i‘lâmdan yetmiş beş sene mukaddem menzil-i mezkûrun nevbet-i tasarrufu evlâd-ı vâkıfdan Âbide nâm hatunun iken mezbûre Âbide menzil-i mezkûr müşrif-i harâbdır deyü âhara îcâr edip el-hâletü hâzihî menzil-i mezkûr mezbûr Hüseyin Efendi’nin yedinde bulunup ve ben dahi evlâd-ı vâkıfdan olmamla menzil-i mezkûrdan kasr-ı yed ve bana teslîme tenbîh olunmak matlûbumdur deyü da‘vâ edip lâkin mezbûre Saide’nin evlâd-ı vâkıfdan olduğu ber-vech-i şer‘î henüz sâbit olmamağla ber-vech-i muharrer evlâdiyet sübûtuna tevkīfen müdde‘iye-i mezbûre mezbûr Hüseyin Efendi’ye bî-vech-i şer‘î mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 15 min-C sene 1206