Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 681 Hüküm no: 1102 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Derviş İsmail’in sahibine ulaştırmak için aldığı parayı ödemesi Ma‘rûz; Medîne-i Üsküdar’da Kefçe mahallesinde sâkin Abdurrahman b. Veliyüddin nâm kimesne medîne-i mezbûrede mahfil-i bâbda meclis-i şer‘-i hatîrde Bostanî Derviş İsmail b. Mehmed nâm kimesne mahzarında târih-i i‘lâmdan bir sene mukaddem gāib ani’l-meclis Şemşeli İbrahim nâm kimesne zimmetinde beynimizde ma‘lûm iltizâm bedelinden bin seksen guruş alacağım olup gāib-i merkūm İbrahim meblağ-ı merkūmun altı yüz elli guruşunu bana teslîm etmek içün mezbûr Derviş İsmail yediyle irsâl ol dahi meblağ-ı merkūmun altı yüz guruşunu bana def‘ u teslîm ve elli guruşu yedinde bâkī kalmağla taleb ederim deyü da‘vâ ve mezbûr Derviş İsmail cevâbında fi’l-hakīka gāib-i mezbûr yedinden işbu müdde‘î-i mezbûra îsâl ve teslîm içün meblağ-ı merkūm altı yüz elli guruş ahzını ve altı yüz guruşu def‘ u teslîm ve elli guruşu yedinde bâkī kaldığını ikrâr lâkin müdde‘î-i mezbûr meblağ-ı merkūm elli guruşu bir ay mukaddem gāib-i mezbûr İbrahim’den ahz ü istifâ etmiş idi deyü eylediği def‘ini isbâta kādir olamayıp talebiyle müdde‘î-i mezbûr gıbbe’t-tahlîfi’ş-şer‘î mûcebiyle meblağ-ı bâkī-i merkūm elli guruşu müdde‘î-i mezbûra def‘ u teslîme mezbûr Derviş İsmail’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 12 min-C sene 1206