Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 683 Hüküm no: 1106 Orijinal metin no: [90b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Efendi’nin bulunduğu evi boşaltması Ma‘rûz; Medîne-i Üsküdar’da Mehmedpaşa mahallesinde sâkin el-Hâc Hasan b. Süleyman mahfil-i bâbda meclis-i şer‘-i hatîrde Mehmed Emin Efendi b. Ahmed mahzarında mahmiye-i İslâmbol’da Hacapaşa kurbünde sâkine Hacce Fatıma nâm sâhibetü’l-hayrın Gemlik kazâsına tâbi‘ Kabaklı karyesinde binâ eylediği mekteb-i şerîf vakfı musakkafâtından olup medîne-i mezbûrede Mirâhor mahallesinde vâki‘ ma‘lûmü’l-hudûd ve’l-müştemilât bir bâb menzil mezbûr Mehmed Emin Efendi’nin dâmâdı müteveffâ Haseki Mehmed Emin Ağa’nın mahlûlünden bâ-temessük tasarrufumda olup menzil-i mezkûrda hâlâ mezbûr Mehmed Emin Efendi sâkin olmağla menzil-i mezkûru tahliye ve bana teslîme tenbîh olunmak murâdımdır deyü ba‘de’d-da‘vâ ve’l-istintâk ve’l-ikrâr mûcebiyle menzil-i mezkûru tahliye ve gāyet-i şehrde müdde‘î-i mezbûra teslîme mezbûr Mehmed Emin Efendi ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 2 min-C sene 1206