Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 683 Hüküm no: 1107 Orijinal metin no: [90b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuğlacı Partimos’un Musa’daki alacağını kefaletinden dolayı oğlu Mustafa’dan tahsil ettiği Ma‘rûz; Havâss-ı refî‘a kazâsına tâbi‘ Hasköy nâhiyesinde mütemekkin sâhib-i arzuhâl Tuğlacı Partimyos v. Serkiz nâm zimmî medîne-i Üsküdar’da mahfil-i bâbda meclis-i şer‘-i hatîrde derûn-ı arzuhâlde mezkûrü’l-ism Mustafa b. Musa mahzarında mezbûrun babası Musa târih-i i‘lâmdan on iki buçuk sene mukaddem yedimden iştirâ ve kabz eylediği aded ve fiyâtı beynimizde ma‘lûm tuğla semeninden zimmetinde mütekarrir üç yüz yetmiş beş guruş alacak hakkım olup hatta karz unvânıyla yedime i‘tâ eylediği temessük mûcebince meblağ-ı merkūmun edâsına mezbûr Mustafa bi’l-emr ve’l-kabûl kefîl ve dâmin oldukdan sonra meblağ-ı merkūm üç yüz yetmiş beş guruşun yirmi iki buçuk guruşunu ahz ve üç yüz elli iki buçuk guruşu bâkī kalmağla kefâletine binâen meblağ-ı bâkī-i merkūm üç yüz elli iki buçuk guruşu taleb ederim deyü eylediği da‘vâsından bâ-tavassut-ı muslihîn an-inkârin on beş guruş bedel-i makbûz mukābelesinde mezbûr Mustafa ile sulh olup ziyâde üç yüz otuz yedi buçuk guruşa müte‘allika âmme-i de‘âvîden mezbûr Mustafa’nın zimmetini ibrâ ve ıskāt ol dahi medfû‘u olan on beş guruşa müte‘allika âmme-i de‘âvîden merkūm Partimyos zimmînin zimmetini ibrâ ve ıskāt ve her biri âharın ibrâsını ba‘de’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 21 min-C sene 1206