Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 684 Hüküm no: 1108 Orijinal metin no: [90b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin vefat eden Mehmed Ağa’ya olan borcunu vârislerine ödediği Ma‘rûz; Mahmiye-i İslâmbol’da Ayasofya-i kebîr mahallesinde sâkin sâhib-i arzuhâl Mehmed Efendi b. Halil nâm kimesne medîne-i Üsküdar’da meclis-i şer‘-i hatîrde derûn-ı arzuhâlde ismi mezkûr Osman Ağa b. Mehmed mahzarında mezbûr Osman Ağa’nın ammioğlu olup Sâbıkā müjdecibaşı el-Hâc Mehmed Ağa’ya zimmetimde iki yüz elli guruş deynim olup ve mezbûr el-Hâc Mehmed Ağa bir buçuk sene mukaddem vefât edip ve mezbûr Osman Ağa dahi vârisi olmağla deyn-i mezkûr iki yüz elli guruşun on guruşunu hatt ü tenzîl ve iki yüz kırk guruşunu sâir vereseye îsâl ve iktisâm içün yedimden ahz ü kabz edip lâkin verese-i sâirenin hisselerini edâ etmeyip verese-i sâire dahi deyn-i meblağ-ı merkūm iki yüz elli guruşu tekrar benden da‘vâ ve lede’l-mürâfa‘a meblağ-ı merkūmu tamamen benden ahz etmeleriyle mezbûr Osman Ağa’ya teslîm eylediğim iki yüz kırk guruşu istirdâd ederim deyü da‘vâ ve mezbûr Osman Ağa bi’l-külliye inkâr etmeğin müdde‘î-i mezbûr müdde‘âsını beyân esnâsında beynlerine muslihûn tavassut edip müdde‘î-i mezbûr eylediği da‘vâsından mezbûr Osman Ağa ile an-inkârin doksan beş guruş bedel-i makbûza sulh olup ziyâde müdde‘âsı olan yüz kırk beş guruşa müte‘allika âmme-i de‘âvîden mezbûr Osman Ağa’nın zimmetini ibrâ ve ıskāt ol dahi medfû‘u olan bedel-i sulh-ı merkūm doksan beş guruşa müte‘allika âmme-i de‘âvîden müdde‘î-i mezbûr Mehmed Efendi’nin zimmetini ibrâ ve ıskāt ve her biri âharın ber-minvâl-i muharrer ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 12 min-Ca sene 1206 Cumâdelâhire