Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 685 Hüküm no: 1109 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avadik v. Kigork’un Takohi bt. Karabet’teki alacağının tahsili Ma‘rûz; Medîne-i Üsküdar’da Yenimahalle’de mütemekkin Avadik v. Kigork nâm zimmî meclis-i şer‘-i hatîrde mu‘arrefetü’ş-şahs Takohi bt. Karabet nâm zimmî muvâcehesinde merkūme Takohi Nasrâniye târih-i i‘lâmdan bir sene mukaddem yedimden iştirâ ve kabz eylediği vezn ve fiyâtı beynimizde ma‘lûm ham sirke semeninden kırk altı guruş hakkımın otuz guruşunu yedinden ahz, bâkī otuz altı guruşu taleb ederim deyü da‘vâ ve merkūme Takohi Nasrâniye cevâbında cihet-i mezkûreden ancak otuz guruş deyni olduğunu ikrâr ziyâde altı guruşu inkâr etmeğin müdde‘iye-i mezbûre ziyâde müdde‘âsını beyân esnâsında beynlerine muslihûn tavassut edip müdde‘î-i merkūm da‘vâ-yı mezkûresinden otuz guruş bedel mukābelesinde merkūme Takohi Nasrâniye ile sulh olup ziyâde müdde‘âsına müte‘allika âmme-i de‘âvîden merkūme Takohi Nasrâniye’nin zimmetini ibrâ ve ıskāt ol dahi ibrâsını kabûl ve bedel-i sulh-ı merkūm otuz guruşun on beş guruşunu hâlen ve bâkī on beş guruşunu târih-i i‘lâmdan beher şehr tamamında üçer guruş otuzar paradan cem‘an dört ay tamamına değin edâ etmek üzere bi’t-terâzî merkūme Takohi Nasrâniye’yi tecîl ve taksît eyledikde ol dahi ber-minvâl-i muharrer müeccelen ve mukāssatan edâya ta‘ahhüd ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 12 min-Ca sene 1206