Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 685 Hüküm no: 1110 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanım bt. Abdullah’ın boşandığı kocasının mehrini taksitle ödeme talebini kabul ettiği Ma‘rûz; Medîne-i Üsküdar’da Kefçe mahallesinde sâkine ve zâtı mu‘arrefe Hanım bt. Abdullah meclis-i şer‘-i hatîrde zevc-i mutallıkı el-Hâc Mehmed b. Mustafa mahzarında mezbûr el-Hâc Mehmed on guruş mehr-i müeccel tesmiyesiyle zevcim iken târih-i i‘lâm günü beni tatlîk etmekle zimmetinde mütekarrir ve ma‘kūdun-aleyh olan on guruş mehr-i müeccelim ile nafaka-i iddet-i ma‘lûme ve meûnet-i süknâm içün bi’t-terâzî takdîr olunan altı guruş ki cem‘an on altı guruşu taleb ve da‘vâ eylediğimde ol dahi mehr-i müeccel-i mersûme ile zevcesi olup ber-vech-i muharrer tatlîkini ikrâr ve meblağ-ı merkūmun on iki guruşunu yedinden ahz mâ‘adâ dört guruşu zevcim mezbûrun edâya iktidârı olmayıp tecîle tâlib olmağla târih-i i‘lâm şehri gāyetinden beher şehr ikişer guruşdan iki ay tamamında edâ etmek üzere tecîl eylediğimde ol dahi ecel-i merkūm hulûlünde edâya ta‘ahhüd birle kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 26 min-C sene 1206