Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 686 Hüküm no: 1112 Orijinal metin no: [91a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ali’nin satın aldığı fırın âlet ve edevatına ait borcunu ödemesi Ma‘rûz; Medîne-i Üsküdar’da Hamam-ı kebîr ittisâlinde vâki‘ el-Hâc Ahmed Fırını demekle ma‘rûf çörekci fırını derûnunda mevcûd beyne’l-esnâf gedik ta‘bîr olunan âlât-ı lâzıme gāib ani’l-meclis Abdullah nâm kimesnenin mülkü iken târih-i i‘lâmdan beş sene mukaddem âlât-ı mezkûrenin dört sehm i‘tibârıyla iki sehmini Hafız Mustafa b. Abdurrahman’a ve bir sehmini Süleyman b. Ömer’e ve bir sehmini gāib ani’l-meclis Hüseyin nâm kimesneye semen-i ma‘lûma bey‘-i bât ile bey‘ ve ol-vechile yedlerinde mülkleri olmağla mezbûrân Hafız Mustafa ve Süleyman Ağa mahfil-i bâbda meclis-i şer‘-i hatîrde fırın-ı mezkûrda müstecirleri Hafız Ali b. Süleyman mahzarında mezbûr Hafız Ali fırın-ı mezkûrda müstecirimiz olmağla âlât-ı mezkûreden sehmimize isâbet eden ücretini bize vermekden imtinâ‘ eder suâl olunup tenbîh olunmak matlûbumuzdur deyü da‘vâ ve mezbûr Hafız Ali cevâbında fırın-ı mezkûrun mukaddemâ mutasarrıfı Abdullah nâm kimesne rub‘ hissesini beş yüz yirmi guruşa bana bey‘ ve semenini gāib ani’l-meclis, beş yüz yirmi sekiz guruş dâyini olan Yağcı es-Seyyid Halil b. Abdurrahman’ı ol-mikdâr deyn ile bana havâle-i mukayyede ile havâle etmiş idi deyü mukaddem târihiyle bey‘ini inkâr etmeğin müdde‘iyân-ı mezbûrân Hafız Mustafa ve Süleyman Ağa sâlifü’z-zikr âlât-ı lâzımenin ber-vech-i muharrer mukaddem târihiyle gāib-i mezbûr Abdullah nâm kimesneden iştirâ eylediklerini esnâf-ı mezkûre Kethudâsı Mustafa b. Hüseyin ve Abdullah Usta b. Ahmed ve es-Seyyid Ahmed b. Mustafa nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle âlât-ı mezkûrenin ücretini ber-vech-i muharrer müdde‘iyân-ı mezbûrâna teslîme mezbûr Hafız Ali’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 12 min-C sene 1206